Foto: QR OAM
Búgin – qoǵamdaǵy eń qadirli, jaýapty ári mańyzdy mamandyq ielerine arnalǵan mereke, Muǵalimder kúni. Buǵan deiin bul kún qazan aiynyń alǵashqy jeksenbisinde atalyp ótetin. Al 2023 jyldan bastap Úkimet qaýlysymen merekeniń naqty datasy – 5 qazan bolyp belgilendi, dep habarlaidy Ult.kz.
Qazirgi tańda elimizdegi 22 myńnan asa bilim berý uiymynda 600 myń ustaz qyzmet etýde. Olar 6 millionǵa jýyq búldirshinderimizge tálim-tárbie berýde.
Qazaqstan Respýblikasynyń Prezidenti Q.K. Toqaev 2025 jylǵy 15 tamyzda ótken Ustazdardyń Respýblikalyq tamyz konferentsiiasynda «Men Qazaqstan ustazdarynyń qajyrly eńbegin joǵary baǵalaimyn, sizder jas býynǵa berip jatqan bilimniń kúshine senemin. Shyn máninde, ustazdyq – jai mamandyq emes, bul – uly missiia. Adam qandai jetistikke jetip, biikke shyqsa da, ustazynyń aldynda ómir boiy shákirt bolyp qalady», - dep ustazdardyń eńbegine joǵary baǵa bergen bolatyn.
QR Oqý-aǵartý ministri Juldyz Súleimenova qazaqstandyq ustazdardy kásibi merekemen quttyqtady.
"Qurmetti ustazdar, qadirli áriptester!
Sizderdi Ustazdar kúnimen shyn júrekten quttyqtaimyn Aǵartýshy-pedagog Y.Altynsarinniń «Maǵan jaqsy muǵalim bárinen de qymbat, óitkeni muǵalim – mekteptiń júregi» degen sózi muǵalimniń el bolashaǵynyń irgetasyn qalaýshy retinde mańyzdy rólin dáleldei túsedi. Bizdiń mindet – bilimdi, adal, jahandyq básekege qabiletti, ozyq oily urpaq tárbieleý arqyly el bolashaǵynyń senimdi ári sapaly negizin qalaý.
Muǵalimniń jai ǵana mamandyq iesi emes, qoǵamnyń ozyq tulǵasy retinde bedelin biiktetken Memleket basshysy Qasym-Jomart Kemeluly Toqaev ustazdy qoǵamnyń basty keiipkeri etý - memlekettik saiasattyń basym baǵyty dep aiqyndaǵan bolatyn.
Memleket basshysy muǵalimderdiń quqyqtyq mártebesin odan ári nyǵaitýdy tapsyryp, birneshe mindetter júktedi. Osyǵan bailanysty biz Parlament Májilisimen birge zańnamalyq ózgeristerdi júzege asyratyn bolamyz jáne osy joly da ustazdar qoǵamdastyǵymen mindetti túrde aqyldasatyndyǵymyzdy da atap ótkim keledi.
Balalarymyzǵa sapaly bilimmen qatar, sanaly tárbie berý de pedagogikalyq qaýymdastyqqa júktelgen asa mańyzdy mindet. Oǵan memleket pen mekteppen qatar, ata-analardyń da atsalysýy ózekti.
Qurmetti ustazdar!
Barshańyzǵa kelip jetken ustazdar merekesi qutty bolsyn! Óskeleń urpaqty tárbieleýdegi ónegeli eńbekterińiz jemisti bolsyn!", - dep jazdy Juldyz Súleimenova.
