QR Eńbek jáne halyqty áleýmettik qorǵaý ministri Birjan Nurymbetov 42 500 teńge járdemaqyǵa ótinim berý joldaryn túsindirdi, dep habarlaidy QazAqparat.
«Jaldamaly jumysshylar úshin ótinish beretin jumys berýshiler nazaryna: sizder aqysyz demalysqa jiberilgen óz qyzmetkerlerińiz úshin ǵana ótinish bere alasyzdar. Qashyqtan, tolyq emes rejimde isteitin, jalaqysyn tolyq alyp júrgen qyzmetkerlerdi bul ótinishke qosa almaisyz. Ótinishti eki portalda: egov.kz – «elektrondy úkimettiń» veb-portaly jáne 42500.enbek.kz portalynda tirkei alasyzdar. Onda kásiporynnyń málimetin kórsetesizder. BIN-di kórsetkende barlyq aqparat shyǵady. Ár jumysshynyń JSN-yn kórsetkende adam týraly barlyq málimet shyǵady, sony bir tekserip alasyzdar. Portalǵa kirgende 20 qyzmetkerdiń ótinishin toptastyryp jibere alasyzdar. Sóitip, ony elektrondy tsifrlyq qoltańbamen bekitesizder. Taǵy da eskertemin, karantinge qatysty kúsheitilgen sharalar kesirinen jumysyńyz toqtap tursa ǵana ótinish jiberińizder. Ony aýdandyq shtabtar tekseredi», - dedi ministr ortalyq kommýnikatsiialar qyzmetinde ótken brifingte.
Ministr jumysshylardyń ózderi ótinim berip, áýre bolmaýyn eskertti.
«Jumysshylardyń ózderi jibergen ótinish báribir qabyldanbaidy. Basqalarǵa kedergi jasamaýyńyzdy suraimyz. 42500.enbek.kz portalynda óz mártebeńizdi baqylai alasyzdar. Ótinishtiń berilgeni jáne qandai satyda qaralyp jatqany týraly málimet ala alasyzdar. Al jeke praktikamen ainalysyp júrgen azamattar ótinishti ózderi beredi. Olar eki portalǵa qosymsha «Elektrondy úkimettiń» telegram-bot-taryn da paidalana alady. Basqa azamattar – jeke tulǵalar osy portaldar arqyly jáne Telegram-bot arqyly ótinim bere alady. Sizderge qoiylatyn bir ǵana shart – jumystaryńyzdyń toqtap turǵany. Ony aýdandyq shtabtar men salyq komiteti tekseredi. Eger kásibińiz toqtamasa, ótinish berýdiń qajeti joq», - dedi B. Nurymbetov.
Erteńnen bastap, egov.kz – «elektrondy úkimettiń» veb-portaly, 42500.enbek.kz portaly jáne Telegram-bottar ótinish qabyldaýdy bastaidy.
«Kaspi bank pen Halyq bank qosymshalary áli daiyn emes. Daiyn bolǵasyn, olar da birden iske qosylady. Sizderden bir ǵana ótinish berýdi suraimyz. Ár portalǵa bir-bir ótinimnen berýdiń qajeti joq. Báribir ekinshi ótinish qabyldanbaidy, biraq ol portaldarǵa salmaq salýy múmkin. Basqa azamattardyń ótinish berýine kedergi bolady», - dedi Birjan Nurymbetov.
