Pavlodar oblysynda 4 jastaǵy erekshe balany uryp-soǵyp, kúsh qoldanǵan 20 jastaǵy dene shynyqtyrý nusqaýshysyna sot úkimi shyqty. Ol kámeletke tolmaǵan balany tárbieleý mindetin tiisinshe oryndamai, qatygezdik tanytqany úshin kináli dep tanyldy. Alaida raqymshylyqqa bailanysty negizgi jazadan bosatyldy, dep habarlaidy ult.kz.
Oqiǵa byltyr qazanda Ekibastuzdaǵy jekemenshik túzetý ortalyǵynda bolǵan. Aýtizm spektri buzylǵan qyzdyń sabaqtan keiin qoly jaraqattanyp, dárigerler súiegi shytynaǵanyn anyqtaǵan.
Ata-anasy beinebaqylaý jazbasyn qarap, politsiiaǵa aryzdanǵan. Tergeý barysynda nusqaýshynyń balany bileginen ustap, zal ishinde súiretkeni, basynan iterip qulatqany jáne aiaǵyna otyryp alǵany anyqtaldy. Bul áreketter shamamen jarty saǵatqa sozylǵan.
Sot nusqaýshyny Qylmystyq kodekstiń 140-babynyń 2-bóligi boiynsha kináli dep tanyp, bir jylǵa bas bostandyǵyn shekteý jazasyn taǵaiyndady. Sonymen qatar ol úsh jylǵa pedagogikalyq qyzmetpen jáne balalarmen jumys isteý quqyǵynan aiyryldy.
Negizgi jaza raqymshylyqqa bailanysty qoldanylmady. Buǵan qosa, sottalýshy jábirlenýshi otbasyna 500 myń teńge ótemaqy tóleýge mindetteldi.
Balanyń anasy raqymshylyq qoldaný týraly sheshimmen kelispeitinin aitty. Onyń sózinshe, qyzy áli de ońaltýdan ótip jatyr, uiqysy buzylyp, beitanys adamdardan qorqý belgileri saqtalǵan.
