Qazaqstanda balalar men jasóspirimderge baǵyttalǵan fastfýd, tátti sýsyndar jáne quramynda qant, tuz ben qanyqqan mai mólsheri joǵary ónimderdiń jarnamasyn shekteý usynyldy, dep habarlaidy ult.kz.
Densaýlyq saqtaý ministrligi atalǵan ónimderdiń jarnamasyn teledidar men radio, áleýmettik jeliler jáne syrtqy jarnama quraldarynda shekteýge qatysty zańnamalyq usynystar ázirledi.
Buǵan deiin Memleket basshysy Úkimetke fastfýdtyń agressivti jarnamasy máselesin qarastyrýdy tapsyrǵan bolatyn. Prezident mundai jarnamanyń balalar arasynda ziiandy ádetterdiń qalyptasýyna áser etip, densaýlyq saqtaý júiesine túsetin júktemeni arttyratynyn aitqan.
Ministrliktiń málimetinshe, usynystyń negizgi maqsaty – balalardyń taǵamdyq tańdaýyna marketingtik yqpaldy azaityp, erte jastan durys tamaqtaný ádetin qalyptastyrý.
Zertteý nátijelerine sáikes, Qazaqstanda 6-9 jastaǵy balalardyń 23 paiyzynda artyq salmaq bar, al 6 paiyzy semizdikke shaldyqqan. Sonymen qatar jasóspirimderdiń 17,5 paiyzy energetikalyq sýsyndardy apta saiyn tutynady.
Ministrlik usynystardy ázirleý kezinde halyqaralyq tájiribe men Dúniejúzilik densaýlyq saqtaý uiymynyń usynymdaryn eskergen. Qazir bul shekteýlerdiń yqpalyn baǵalaý úshin retteýshilik áserdi taldaý jumystary bastaldy.
Aita keteiik, Qazaqstanda 21 jasqa tolmaǵandarǵa energetikalyq sýsyndardy satýǵa tyiym salynǵan. Al 2025 jylǵy qyrkúiekten bastap bilim berý uiymdarynda jańa tamaqtaný standarty engizildi. Qujatta balalar ratsionyndaǵy qant pen tuzdy azaityp, kókónis, jemis jáne sút ónimderiniń úlesin arttyrý kózdelgen.
Ministrlik bul sharalar belgili bir ónimderdi satýǵa tyiym salýdy emes, olardyń balalar arasynda jarnamalanýy men nasihattalýyn shekteýdi kózdeitinin atap ótti.
