Memleket basshysy Nursultan Nazarbaev 28 maýsymda ótken úkimet otyrysynda buqaralyq kásipkerlikti damytý, aýyl turǵyndaryn jumyspen qamtý jáne jeke qosalqy sharýashylyqtardyń áleýetin paidalaný arqyly qaita óndeýshi kásiporyndardyń qýattylyǵyn júkteýge qatysty tiisti vedomstvoǵa tapsyrma bergen bolatyn. Osy mindetterdi júzege asyrý úshin Aýyl sharýashylyǵy vitse-ministri Qairat Aitýǵanov Premer-ministr Baqytjan Saǵyntaevtan oblys ákimdikterine atalǵan jumysty jedeldetýge hattamalyq tapsyrma berýdi surady, dep habarlaidy BNews.kz.
«Aýyl sharýashylyǵy ministrligi, oblys ákimdikteri men Densaýlyq saqtaý jáne áleýmettik damý ministrligi arasynda osy jyldyń sońyna deiin sharalardy júzege asyrýdyń naqty mindetteri men indikatorlaryn anyqtaityn úshjaqty josparǵa qol qoiyldy. 28 shildeden bastap 30 tamyzǵa deiin barlyq oblysta jáne keibir aýdandarda sharalardy júzege asyrý mehanizmderi, sonyń ishinde kooperativter qurý men qarjylandyrý talaptary tolyq túsindirildi. Ákimdikterdiń tilegi boiynsha qazan aiynan bastap aýyl okrýgteriniń ákimderi men aýdan ákimderiniń orynbasarlary úshin oqytý seminarlary júrgizilip jatyr. Qazirgi tańda seminar Qaraǵandy, Shyǵys Qazaqstan, Jambyl, Almaty jáne Pavlodar oblystarynda ótkizildi. Barlyǵy JAO 966 qyzmetkeri oqytyldy. Respýblika boiynsha 15 qarashaǵa deiin 2 400 aýyl okrýginiń ákimi men aýdan ákimderiniń orynbasarlary oqytylady», – dedi Qairat Aitýǵanov.
Ákimdikterdiń josparyna sáikes, biylǵy jyldyń sońyna deiin 150 aýyl sharýashylyǵy kooperativi uiymdastyrylady. Olar 100 sút qabyldaý pýnkti men 2 myńnan astam otbasylyq bordaqylaý alańyn biriktirmek.
«28 sút qabyldaý pýnkti jáne 3,2 myń otbasylyq bordaqylaý alańy quryldy. Nátijesinde 15 myń jeke qosalqy sharýashylyq qamtylatyn bolady. Bekitilgen josparda aitylǵandai, 20 tamyzǵa deiin áleýetti ótinim berýshilerdiń tizimi jáne qarjylandyrýǵa ótinimder qalyptastyrylý kerek. Alaida keibir oblystarda áleýetti qatysýshylar anyqtalmaǵan jáne jospardy oryndaý bastalmaǵan. Jospardy oryndaýǵa qatysty jumystar Qostanai, Atyraý jáne Soltústik Qazaqstan oblystarynda nashar júrip jatyr. Otbasylyq bordaqylaý alańdaryn qurý boiynsha jospar Shyǵys Qazaqstan oblysynda nebári 15%-ǵa oryndalǵan. Qol qoiylǵan josparlarǵa sáikes kooperativterdi qurý merzimi osy jyldyń 10 qyrkúiegine belgilengen. Oblys ákimdikteri aýyl sharýashylyǵy kooperativterin qurýǵa nemquraidy qarap otyr. Ortasha kooperativterge 3-4 qatysýshy qamtylǵan. Saldarynan aýyl sharýashylyǵy ónimderin óndirýmen ainalysatyn JQSh tolyq qamtylmai otyr. Sondyqtan, qurylatyn kooperativterdi qarjylandyrý kezinde JQSh maksimaldy qamtý úshin 20-dan kem emes qatysýshy bolý talaby qoiylǵan», – deidi vitse-ministr.
