Foto: artmetall.ua
Tarazda avtosalonnyń burynǵy menedjeri asa iri kólemdegi alaiaqtyq jasaǵany úshin 8 jylǵa bas bostandyǵynan aiyryldy. Bul týraly Bas prokýratýranyń baspasóz qyzmeti habarlady.
25 jastaǵy qala turǵyny avtosalonda satý bóliminiń basshysy bola júrip, klientter men jumys berýshiniń senimin teris paidalanǵan. Tergeý málimetinshe, ol klient áielge quny 90 mln teńge turatyn kóligin jańasyna aýystyryp berýge ýáde etip, avtokólikti satyp jiberip, túsken qarajatty óz qajetine jumsaǵan.
Izin jasyrý úshin ol basshylyqtyń ruqsatynsyz avtosalonǵa tiesili 83 mln teńgelik jańa kólikti klientke bergen. Sonymen qatar, satýǵa qoiylǵan quny 68 mln jáne 34 mln teńge bolatyn avtokólikterdi de satyp, qarjysyn iemdengen.
Budan bólek, avtosalon menshigindegi 59 mln teńgelik jańa Toyota Land Cruiser kóligin tómen baǵamen ótkizip jibergen.
Sot ony asa iri mólsherdegi alaiaqtyq jáne senip tapsyrylǵan múlikti iemdený baptary boiynsha kináli dep tanydy. Alǵashqy úkim boiynsha ol 5 jyl 1 aiǵa sottalǵanymen, prokýror narazylyǵynan keiin is qaita qaralyp, jaza merzimi 8 jylǵa deiin ulǵaityldy. Buǵan keltirilgen shyǵynnyń ótelmeýi sebep bolǵan.
Mamandar kólik satyp alý kezinde muqiiat bolýǵa shaqyrady: kelisimshart talaptaryn tekserip, qujattardyń túpnusqalyǵyna kóz jetkizý jáne tólemniń tek resmi shotqa túsýin baqylaý qajet.
