300 myńnan astam qazaqstandyq ziiandy eńbek jaǵdaiynda jumys isteidi. Bul jaiynda QR Eńbek jáne halyqty áleýmettik qorǵaý birinshi vitse-ministri Ahmádi Sarbasov málim etti, dep habarlaidy QazAqparat.
«Búginde elimizde 300 myńnan astam jumysshy ziiandy eńbek jaǵdaiynda jumys istep júr. Jumys berýshiler bul maqsatqa jyl saiyn Eńbek kodeksinde kózdelgen kepildi qamtamasyz etý úshin qomaqty qarajat jumsaidy. Sondyqtan da bizdiń birlesken mindetimiz – nóldik jaraqattanýdy qamtamasyz etý», - dedi birinshi vitse-ministr elordada ótip jatqan KIOSH-2022 X Qazaqstandyq eńbekti qorǵaý jáne ónerkásiptik qaýipsizdik jónindegi halyqaralyq konferentsiia barysynda.
Onyń atap ótýinshe, ótken jyly Qazaqstan Úkimeti áleýmettik seriktesterimen birge jaraqattanýdyń nóldik kórsetkishin qamtamasyz etýge baǵyttalǵan is-sharalar josparyn qabyldady.
«Samuryq-Qazyna» qorymen, sonymen qatar Halyqaralyq áleýmettik qamtamasyz etý qaýymdastyǵymen memorandýmǵa qol qoiyldy. Bul is-sharalardyń barlyǵy jumys ornyndaǵy ziiandy jumys faktorlaryn tómendetýge jáne nóldik jaraqattanýdy qamtamasyz etýge baǵyttalǵan. Osy maqsatta ótken jyly Úkimet 2025 jylǵa deiingi is-sharalardyń arnaýly josparyn qabyldady. Onyń aiasynda biz áleýmettik seriktestermen birge nóldik jaraqattanýǵa jáne ziiandy eńbek jaǵdailary bar jumys oryndarynyń sanyn qysqartýǵa qol jetkizýmiz qajet», - dedi Aqmádi Sarbasov.
