Memlekettik qyzmet isteri agenttigi basshysynyń jańa orynbasary Ainur Serǵazieva áleýmettik jelide aitylǵan synǵa jaýap berdi, - dep habarlaidy Tengrinews.kz tilshisi.
30 jastaǵy Ainur Serǵazievanyń memlekettik qyzmette joǵary laýazymǵa ie bolǵany týraly habardy Qaznet qoldanýshylary ártúrli qabyldady. Keibireýler ol bul qyzmetke sheneýnik týystarynyń arqasynda kelgen bolýy múmkin degen boljam aitqan bolatyn.
Osydan keiin sheneýnik Instagram paraqshasynda ózine qatysty aitylǵan barlyq qaýesetter men syndarǵa jaýap berdi. Serǵazievanyń aitýynsha, ol agenttiktegi bos jumys orny týraly burynǵy jumysyndaǵy áriptesterinen bilgen.
"UAT-ta prezidenttik rezervshiler maǵan Memlekettik qyzmet isteri agenttigi basshysynyń tsifrlyq orynbasaryn izdep jatqanyn, biraz adamdy suhbatqa shaqyrǵanyn aitty. Mende óz baǵymdy synap kórýge sheshim qabyldadym. Biraq meni negizgi úmitker retinde qarastyryp jatqanyn taǵaiyndaýdan úsh kún buryn bildim", - dedi Serǵazieva.
Ol ózi týraly aitylatyn "baidyń qyzy, yqpaldy týystary bar" degen sekildi qaýesetterge toqtaldy.
"Bul aitylǵandar jalǵan. Ipotekada páterim bar, zeinetker ata-anam Oralda turady, qarapaiym saýda núktelerinen alǵan sómkelerim, Tiffanidiń kúmis áshekeileri bar. Men sheneýnik bolǵan emespin, kúieýim de, balalarym da joq, jalaqymdy ózime jumsaimyn.
Memlekettik qyzmetke ne úshin keldińiz? Elimizdi jaqsy jaqqa ózgertý úshin, óskeleń urpaqtyń ókili retinde damýǵa úles qosqym keledi", - dedi sheneýnik.
Serǵazievanyń aitýynsha, jańa laýazymda ol memlekettik qyzmette meritokratiiaǵa jetýge nietti. Ol úshin kelesi mindetterdi sheshýdi josparlap otyr:
- tsifrlandyrý arqyly memlekettik qyzmetshilerdi irikteý/qabyldaý/jumystan shyǵarý protsesin ashyq etý;
- MQIA memlekettik qyzmetterdiń sapasyn baǵalaý salasyndaǵy ýákiletti organ bolyp tabylatyndyqtan, memlekettik organdarǵa aqparat usyna otyryp, memlekettik qyzmetterdiń sapasy týraly keri bailanysty jinaý protsesin tsifrlaý (klientke baǵdarlaný);
- Memlekettik qyzmettiń ashyqtyǵy men aiqyndyǵyna qol jetkizý úshin tsifrlandyrýda memlekettik qyzmetshilerdiń biliktiligin arttyrý.
"Óz jumysym týraly aita otyryp jáne jurtshylyqpen aqyldasa otyryp, ashyqtyq pen aiqyndyqtyń úlgisi bolýǵa tyrysamyn. Ister men nátijelerdi talqylaiyq. Men árqashan syndarly dialogqa ashyqpyn", - dep túiindedi ol.
