1992 jyldyń 2 naýryzy Qazaqstan táýelsizdigin dúniejúzilik qoǵamdastyq moiyndaǵan el tarihyndaǵy mańyzdy oqiǵaǵa toly kún. 29 jyl buryn Qazaqstan Birikken Ulttar Uiymyna 168-shi múshe-memleket atandy, dep habarlaidy QR SIM baspasóz qyzmeti.
1945 jyly qurylǵan BUU 76 jyl ótse de búginde balamasyz ámbebap jahandyq uiym bolyp qala beredi jáne búkil adamzattyń múddesi men qajettiligine aianbai qyzmet etip keledi.
Táýelsizdik alǵan kezden beri Qazaqstan BUU-men tabysty ekijaqty áriptestik ornatyp, Uiym Jarǵysynyń maqsattary men qaǵidattaryn tolyq ustanatynyn kórsetti. BUU-men tiimdi yntymaqtastyqtyń qalyptasýyna joǵary deńgeidegi kóptegen bailanystar yqpal etti. 1992 jyldan beri Qazaqstan Respýblikasynyń Prezidenti Uiymnyń Niý-Iorktegi shtab-páterine 11 ret baryp, Bas Assambleianyń joǵary deńgeidegi jalpysaiasi debattarynda 9 ret sóz sóiledi. BUU Bas hatshylary Kofi Annan, Pan Gi Mýn jáne Antoniý Gýtterish elimizge birneshe ret resmi saparmen keldi. QR Prezidenti Qasym-Jomart Toqaev 2011-2013 jyldary BUU Bas hatshysynyń orynbasary – BUU-nyń Jenevadaǵy bólimshesiniń Bas direktory qyzmetin atqardy.
Ár jyldary BUU-nyń minberinen Elbasy Nursultan Nazarbaev pen Prezident Qasym-Jomart Toqaev jariialaǵan Qazaqstannyń negizgi halyqaralyq bastamalarynyń qataryna Aziiadaǵy ózara is-qimyl jáne senim sharalary jónindegi keńesti shaqyrý, BUU-nyń Ortalyq Aziia ekonomikasy úshin arnaiy baǵdarlamasyn qurý, 29 tamyzdy Halyqaralyq iadrolyq synaqtarǵa qarsy is-qimyl kúni dep jariialaý, Biologiialyq qaýipsizdik jónindegi halyqaralyq agenttikti qurý jáne t.b jatady.
Uiymdaǵy músheligimizdiń sharyqtaý shegi - Qazaqstannyń 2017-2018 jyldar aralyǵynda Ortalyq Aziiada birinshi bolyp BUU Qaýipsizdik Keńesiniń turaqty emes múshesine sailanýy boldy. Beibitshilik pen qaýipsizdikti qamtamasyz etetin negizgi organǵa múshe bolý Qazaqstannyń halyqaralyq qaýymdastyqtaǵy belsendi jáne jaýapty seriktes retindegi bedelin nyǵaitýǵa múmkindik berdi.
Qazaqstannyń BUU-men ekijaqty qarym-qatynasy tek álemdik jáne aimaqtyq deńgeimen ǵana shektelmei, elimizde de qarqyndy damyp keledi. QR Úkimetiniń BUU-men yntymaqtastyǵy 2021-2025 jyldarǵa arnalǵan turaqty damý jónindegi yntymaqtastyqtyń Negizdemelik baǵdarlamasy sheńberinde júzege asady. Ol úsh baǵyttaǵy jumysty qamtidy: adami damý jáne teń qatysý; tiimdi institýttar, adam quqyqtary jáne genderlik teńdik; turaqty qorshaǵan orta jáne inkliýzivti ekonomikalyq damý.
Qazirgi ýaqytta Qazaqstanda Uiym júiesiniń 23 qurylymy jumys isteidi.
2019 jyldyń 1 mamyrynda QR Prezidentiniń qatysýymen Almatyda BUU júiesiniń 16 uiymy ornalasqan halyqaralyq uiymdardyń jańa ǵimaraty ashyldy.
