Foto: © Sputnik / Abzal Kaliev
Jetisý oblysy boiynsha Sybailas jemqorlyqqa qarsy qyzmet Taldyqorǵan qalasy bilim bóliminiń basshysyna qatysty tergeý júrgizip jatyr, dep habarlaidy "Ult aqparat" Antikor baspasóz qyzmetine silteme jasap.
"Ol bilim bóliminde biýdjet qarajatyn urlaý faktilerin jasyrǵany úshin qaramaǵyndaǵy qyzmetkerlerden 280 mln teńge para aldy degen kúdikke ilindi. Sottyń sanktsiiasymen kúdikti qamaýǵa alyndy", - delingen habarlamada.
Óz kezeginde, para bergen adamdar – biýdjet aqshasyn asa iri mólsherde urlaý týraly is boiynsha negizgi aiyptalýshylar jáne sot sanktsiiasymen qamaýda otyr.
Sotqa deiingi tergeý jalǵasyp jatyr. Kúdiktilerge qatysty túpkilikti úkimdi olardyń kinásiniń dárejesin aiqyndai otyryp, sot shyǵarady.
QPK-niń 201-babyna sáikes tergeý múddesi úshin ózge aqparat jariia etilmeidi.
Eske salsaq, Taldyqorǵan qalalyq bilim bóliminiń býhgalteri 2 mlrd teńge jymqyrdy degen kúdikke ilingen bolatyn. Bas esepshimen birge onyń orynbasary jáne birneshe qyzmetker qamaýǵa alyndy. Olar birneshe jyldan beri bilim salasynda jumys istemeitin adamdarǵa aqsha aýdaryp júrgen.
