Qańtar oqiǵalary saldarynan 273 politsiia qyzmetkeri men áskeri qyzmetshi múgedek bolyp qaldy. Bul týraly QR IIM Tergeý departamentiniń bastyǵy Sanjar Ádilov aitty, dep habarlaidy QazAqparat.
«Buǵan deiin atap ótkendei tártipsizdikter barysynda 3 myńnan astam quqyq qorǵaý organdary qyzmetkerleri jáne áskeri qyzmetshiler ártúrli dene jaraqattaryn aldy. Onyń ishinde atys jáne pyshaqtaý jaraqattary, sondai-aq basqa da aýyr zardaptar bar. Qazirgi ýaqytta meditsinalyq mekemelerde jappai tártipsizdikter barysynda aýyr jaraqat alǵan 273 qyzmetker men áskeri qyzmetshi emdelýde. Olardyń bir bóligi osy ýaqytqa deiin jan saqtaý bóliminde. Ókinishke orai olar ary qarai jumys jasai almaidy, is júzinde múgedek bolyp qaldy», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, politsiia qyzmetkerleri men áskerilerdi qatygezdikpen uryp-soǵýdyń, sondai-aq ákimshilik jáne ózge ǵimarattarǵa shabýyl jasaýdyń kadrlary áleýmettik jelilerde jetkilikti mólsherde bar. Olardyń kópshiligin tártipsizdikterge qatysýshylardyń ózderi taratty.
«Basqa málimettermen qatar osy beinejazbalar boiynsha qylmystyq shabýyldarǵa qatysqan adamdar anyqtalýda. Máselen, Atyraýda qalanyń ortalyq kósheleriniń birinde 5-shi qańtarda oblystyq ákimdik ǵimaratyn qorǵaýǵa tartylǵan politsiia qyzmetkerlerin top bolyp qatygezdikpen uryp-soqqan osy qalanyń eki turǵyny ustaldy. Beinede kórinip turǵandai, shabýyldaýshylar bir qyzmetkerdi jerge jatqyzyp, ony teýip, taiaqpen urǵan. Ekinshisin aiaqpen, qolmen, sondai-aq kaskamen basynan uryp, aýyr zaqym keltirgen. Sol qalada tártipsizdikke qatysýshylar jedel járdem avtomashinasyn buǵattap, aýrýhanaǵa jetkizilip bara jatqan jaraqattanǵan politsiia qyzmetkerlerin qaita uryp-soqqan. Osy faktiler boiynsha Atyraý qalasynyń tórt turǵyny anyqtaldy, olar sottyń sanktsiiasynan qamaýǵa alyndy», - dedi departamenti bastyǵy.
Sanjar Ádilovtiń dereginshe, Qyzylordada 5 qańtarda áskerilerden tartyp alynǵan «Kamaz» arnaiy avtomashinasyn qoǵamdyq tártipti qorǵaýdy qamtamasyz etken qyzmetkerler tizbegin basyp ótýge baǵyttaǵan osy qalanyń turǵyny ustaldy. Kólikpen basyp ketýdiń nátijesinde Ulttyq ulannyń 19 jasar áskeri qyzmetshisi oqiǵa ornynda kóz jumdy.
«Ata-anasy jalǵyz ulynan airyldy, tiri kúninde ol baǵdarlama jasaýmen ainalysýshy edi jáne filosofiiamen áýestengen. Qaraǵandy memlekettik tehnikalyq ýniversitetinde oqydy. Ómirge úlken josparlar jasap, IT-maman bolýdy armandaǵan edi», - dedi ol.
«Sol kúni osy qalanyń taǵy bir shabýylshysy áskerilerden basqa «Kamaz» avtomashinasyn tartyp alyp, jedel basqarý ortalyǵynyń jumysyna kedergi jasaý maqsatynda elektr baǵanyn qasaqana soǵyp, beinebaqylaý kameralaryn isten shyǵardy. Odan soń Jergilikti politsiia qyzmetiniń ǵimaratyn basyp alý maqsatynda qorshaýdyń qaqpasyn soqty. Eki oqiǵa boiynsha da kúdiktiler sot sanktsiiasymen qamaýǵa alyndy, beinejazbalar olardyń kinásin dáleldeidi», - dedi departament bastyǵy.
Onyń atap ótýinshe, osyǵan uqsas faktiler elimizdiń birqatar óńirinde, ásirese Almatyda oryn aldy.
«Mysaly, osy qalada jappai tártipsizdikter barysynda qyzmetkerlerge dene jaraqattaryn keltirý úshin metall kesindilerin ázirlep, qalanyń kóshelerinde «Gazel» avtomashinasymen júrip, olardy narazylyq bildirýshilerge taratqan alty adam ustaldy», - dedi Sanjar Ádilov.
