Mańǵystaýda «Ekpe saldyr da, páter utyp al» naýqanynyń qorytyndysy belgili boldy, dep habarlaidy "Ult aqparat".
27 jastaǵy mańǵystaýlyq turǵyn Qairat Qosaevqa 38-inshi shaǵynaýdanda ornalasqan 2 bólmeli páterdiń kilti tabystaldy. Jańa úidi «K7 Group» qurylys kompaniiasy salǵan.
Jeńimpazdyń aitýynsha, vaktsinany ol utysqa qatysý úshin emes, óz densaýlyǵyn kútý maqsatynda saldyrǵan. Ol oblys turǵyndaryn qazirgi epidemiologiialyq ahýalǵa salmaqty qarap, ekpe alýǵa shaqyrdy.
«Uiymdastyrýshylarǵa kóp raqmet. Bastapqy ýaqytta bul naýqanǵa sengen joqpyn. Qazir shynaiy ekenine kózim jetip otyr. Qýanyshtymyn. Jeke baspanam joq edi, endi ata-anam Aqtaýǵa kóship kelgende turatyn úii daiyn», - dedi Qairat Qosaev.
Eske sala keteiik, naýqan bir jarym aiǵa deiin sozyldy. 40-qa jýyq adam baǵaly syilyqtardyń iesi atandy.
