Qazaqstanda agroónerkásiptik keshendi qoldaýǵa bólingen 2,6 milliard teńgeden astam biýdjet qarajatyn jymqyrý deregi boiynsha tergeý aiaqtaldy. Is materialdary sotqa joldandy, dep habarlaidy ult.kz.
Tergeý málimetinshe, qylmystyq shemany Almaty oblysy Qarasai aýdandyq máslihatynyń burynǵy depýtaty uiymdastyrǵan. Ol aýyl sharýashylyǵy salasyndaǵy tájiribesi men memlekettik sýbsidiialaý tetikterin paidalanyp, biýdjet qarjysyn zańsyz alý júiesin qurǵan.
QMA málimetinshe, shemaǵa uiymdastyrýshyǵa qarasty kásiporyndar men Almaty, Jambyl jáne Túrkistan oblystarynda tirkelgen 29 sharýa qojalyǵy tartylǵan. Olar ónerkásiptik tańqýrai alqaptaryn otyrǵyzýǵa arnalǵan elitalyq kóshetterdi satyp alǵany týraly jalǵan qujattardy ýákiletti organdarǵa tapsyrǵan.
Tergeý barysynda jalǵan satyp alý-satý sharttary, qabyldaý-tapsyrý aktileri, elektrondyq shot-faktýralar jáne otyrǵyzý materialyn óndirýshilerdi attestattaý qujattary rásimdelgeni anyqtaldy. Alaida kórsetilgen kólemdegi kóshetter is júzinde jetkizilmegen, al keibir sharýashylyqtardyń ónerkásiptik kólemde tańqýrai ósirýge múmkindigi bolmaǵan.
Osynyń saldarynan memleketten 2,6 milliard teńgeden astam sýbsidiia zańsyz alynǵan.
Tergeý deregine sáikes, zańsyz alynǵan qarajattyń 491 million teńgesi qor naryǵyndaǵy operatsiialarǵa baǵyttalǵan. Ol úshin kúdiktiniń jubaiynyń atyna brokerlik shot ashylyp, qazaqstandyq jáne sheteldik kompaniialardyń baǵaly qaǵazdary satyp alynǵan.
Budan bólek, 400 million teńge ýaqytsha qarjylai kómek kórsetý syltaýymen iSolutions Capital mikroqarjy uiymyna aýdarylyp, keiin kezeń-kezeńimen qolma-qol aqshaǵa ainaldyrylǵan.
Sondai-aq kúdikti urlanǵan qarajattyń 170 million teńgesin Qonaev qalasyndaǵy kazinoda qumar oiyndarǵa jumsaǵany anyqtalǵan.
Sot sanktsiiasymen kúdiktilerdiń tórt páterine, úsh avtokóligine, jeke turǵyn úiine jáne baǵaly qaǵazdaryna tyiym salyndy. Úsh kúdikti qamaýǵa alynyp, qylmystyq is sotqa jiberildi.
Eske salaiyq, buǵan deiin bul is boiynsha Qarasai aýdandyq máslihatynyń burynǵy depýtaty Beket Ábishev pen ózge de tulǵalardyń kúdikke ilingeni habarlanǵan bolatyn. Tergeý barysynda Aýyl sharýashylyǵy ministrligi departamentteriniń burynǵy direktorlarynyń biriniń de 2018–2022 jyldary Jambyl jáne Túrkistan oblystarynda sýbsidiia alý kezindegi alaiaqtyq shemaǵa qatysy bolǵany anyqtalǵan.
