Premer-Ministr Álihan Smaiylov TJM basshysy Iýrii Ilinmen jáne Aqtóbe oblysynyń ákimi O. Orazalinmen, Pavlodar oblysynyń ákimi Á. Sqaqovpen, Batys Qazaqstan oblysynyń ákimi Ǵ. Esqalievpen jáne Soltústik Qazaqstan oblysynyń ákimi Q. Aqsaqalovpen telefon arqyly sóilesti. Ministr men óńir basshylary eldegi sý tasqyny jaǵdaiy týraly baiandady, dep habarlaidy "Ult aqparat" Úkimettiń saityna silteme jasap.
TJM basshysynyń habarlaýynsha, búginde Qazaqstanda 227 eldi meken qaýipti aimaqta tur. Sý basýǵa úsh nárse sebep boldy. Bul – qardy ýaqytyly shyǵarmaý, tazartylmaǵan aryqtar men erigen sýlar. Qazirgi tańda sý basý qaýpi elimizdiń soltústik jáne batys óńirlerinde saqtalyp otyr.
Eldi mekenderdi sý tasqynynan qorǵaý maqsatynda 2017 jyly 2021-2023 jyldarǵa arnalǵan sý tasqynyna qarsy is-sharalardyń jol kartasy ázirlenip, bekitildi.
Jol kartasy aiasynda 2021 jyly júzege asyrý josparlanǵan 68 is-sharanyń 33-i oryndaldy jáne 4-i merziminen buryn oryndaldy.
Jalpy elimiz boiynsha sý tasqyny qaýpi bar 1010 eldi mekenniń 285-inde sý basý qaýpi saqtalyp otyr. Bul oraida 340 eldi mekendi sý basý qaýpi joiylyp, 385 eldi mekende seiildi. Biylǵy 31 naýryzdaǵy jaǵdai boiynsha qar jamylǵysynyń aýdany 47%-dy quraidy.
Biyl jylynýdyń birinshi tolqyny barysynda ShQO, BQO, Atyraý oblystarynda avtomobil joldarynyń 3 ýchaskesin sý basý jaǵdailary tirkeldi.
Qalyń qardyń erýine bailanysty bolǵan ekinshi tolqynnyń saldarynan Pavlodar oblysynyń Rojdestvenka aýylyndaǵy eki turǵyn úi, Batys Qazaqstan oblysynyń Shalǵyn aýylyndaǵy 25 úi men 2 áleýmettik nysan (Qoskól kentiniń halqy evakýatsiialandy) erigen qar sýynyń astynda qaldy, Aqtóbe jáne Batys Qazaqstan oblystaryndaǵy 3 avtomobil joly ýchaskelerin sý shaiyp ketti.
Óz kezeginde óńir ákimderi sý basqan aýmaqtardy qalpyna keltirý boiynsha qabyldanyp jatqan sharalar týraly baiandady.
QR Premer-Ministri Jol kartasyn iske asyrýdy jedeldetýdi, kelip túsken shaǵymdarǵa jedel áreket etýdi, sý basý qaýipterin joiýdy tapsyrdy. Sondai-aq azamattardyń qaýipsizdigin qamtamasyz etý úshin barlyq sharalardy júzege asyrýǵa erekshe nazar aýdarý qajet. Óńir basshylary bul máseleni erekshe baqylaýǵa alýy tiis.
Esterińizge sala keteiik, biylǵy 22 aqpanda Úkimet otyrysynda ortalyq jáne jergilikti atqarýshy organdardyń sý tasqyny kezeńine daiyndyq sharalary qaraldy. QR Premer-Ministri Á. Smaiylov ákimdikterge qardy, ásirese, aýyldyq eldi mekenderden shyǵarý, aryqtardy, nóser kárizderin tazartý, ýaqytsha bógetter salý jumystaryn ýaqytyly júrgizý týraly tapsyrma berdi.
