Astananyń Saryarqa aýdanyna qaraityn Avtomatika aýylyndaǵy №6 úidiń turǵyny qala ákiminiń birinshi orynbasary Sergei Horoshýnǵa shaǵymdandy, dep habarlaidy QazAqparat tilshisi.
«22 jyl boiy jylýsyz turý múmkin be? Joq. 2014 jyldan beri úiimizdi turýǵa jaramsyz etip tapsyn dep jantalasyp kelemin. Apatty úiler tizimine 47% tozǵan dep kórsetedi. Birinshiden, komissiia jalǵan tehnikalyq akt jasady. Jylý qubyry trassasynyń 80% tozǵan dep jazylǵan. Jylý qubyry joq bolsa, qalai tozady? Gaz joq, ystyq sý joq, káriz júiesi eki jyldan beri jertólege aǵyp júr. Óz kúshimizben jóndep kórdik, biraq qys kelisimen jylý bolmai, qubyrlar taǵy jarylady, taǵy da jertólege baryp quiylady (...) Munda 6 úi, 1 balabaqsha jáne 1 dúken boldy. Bes úidi apatty dep tanyp, basqa jaqqa kóshirdi. Al bizdiń bes qabatty úidi qaldyrdy. Biz onda mamonttar sekildi qyrylyp qalatyn shyǵarmyz», - dedi turǵyn birinshi orynbasardyń esep berý jiynynda.
Úi turǵyny apatty úide zeinetkerler turatynyn atap ótti. Olar qys mezgilinde «býrjýika» peshterin qoldanyp, besinshi qabatqa kómir tasýǵa májbúr bolady.
Sergei Horoshýn óz jaýabynda máseleli úi týraly habardar ekenin aitty.
«Bul bes qabatty turǵyn úi DSK panelinen turǵyzylǵan. Konstrýktsiialar boiynsha tujyrymdamaǵa sáikes másele týyndamady. Biraq, Siz ótinish aityp otyrǵandyqtan, kelesi aptada ózim shyǵyp aýdandyq ákimdikpen jáne turǵyn úi inspektsiiasymen baramyn. Máseleni sheshýge tyrysamyn», - dep jaýap berdi Astana ákiminiń birinshi orynbasary.
