Sýret: YouTube/Habar NEWS
Qazaq án óneriniń koroli Shámshi Qaldaiaqovtyń kelini Botagóz Qaldaiaqova Ortalyq kommýnikatsiialar qyzmetinde ótken brifingte ziiatkerlik menshik taqyrybyna toqtaldy. Ol kompozitordyń jazyp ketken hit ánderi úshin otbasyna az aqsha tólenetinin málimdedi, dep habarlaidy "Ult aqparat" KAZ.NUR.KZ saityna silteme jasap.
"Ádilet ministrligine Qazaqstandyq avtorlyq quqyq qoǵamynyń qyzmetine tekserý júrgizý qajet, óitkeni biz osy muragerlerimiz (Qaldaiaqovtyń ánderine avtorlyq quqyq – red. eskertpesi), atalǵan qoǵam múshesimiz, biraq biz quqyqty shektep jatqanyna narazylyq bildiremiz. 2019 jylǵa deiin jaǵdai sál de bolsa durys bolyp edi, tólemder aldyq. 2019 jyldan keiin tólemder toqtatyldy. Shámshi Qaldaiaqovtyń shyǵarmalaryn paidalanǵany úshin bir toqsanǵa keshe 22 myń teńge aldyq. Bul ánurannan bólek, avtordyń 55 áni úshin berilgen qarajat. Óitkeni qazir ánuran memleket menshigi bolyp tabylady", - dedi Botagóz Qaldaiaqova.
Ol kóptegen is-sharany uiymdastyratyn Qaldaiaqov qorynyń direktory ekenin jáne olarǵa únemi qarajat izdeý keregin aitty.
"Men qordyń direktory retinde demeýshilerden suraýdan sharshadym, óitkeni biz úlken somany Shámshi Qaldaiaqovtyń esimi úshin Qazaqstan avtorlar qoǵamy jinaitynyn bilemin", - dedi Botagóz Qaldaiaqova.
Mysal retinde ol Qairat Nurtastyń ánderiniń avtoryna tólengen tólemderdi keltirdi. Onyń aitýynsha, avtor mátini úshin 1 million teńgeden alady. Botagóz Qaldaiaqova barlyq tanymal avtor mundai syiaqy alýy kerek dep esepteidi. Sońǵy bir jylda Qazaqstandaǵy avtorlyq quqyq ieleri 500 million teńgeden astam shyǵynǵa ushyraǵan. Bul týraly Ádilet ministrligi Ziiatkerlik menshik departamentiniń direktory Sholpan Ábdireeva aitty.
"2023 jyly ujymdyq basqarý uiymdary 1 mlrd 550 mln 346 myń 423 teńge jinaǵan. Avtorlarǵa 439 million 192 myń teńge berilgen, kórip otyrǵandai, somanyń jartysynan astamy tólenbegen. Sáikesinshe, suraq týyndaidy: bul aqsha qaida?" - dedi spiker.
Ádilet vitse-ministri Botagóz Jaqsylekovanyń aitýynsha, vedomstvo bar aryz boiynsha tekserýge kirisedi. Maqsat – qarajatty ashyq bólý, óitkeni avtorlar jinalǵan qarajattyń 70 paiyzyn alýy kerek.
