Soltústik Qazaqstan oblysynda internet-alaiaqtarǵa bank shottaryn taýyp berip, qylmystyq shemaǵa kómektesken bes adamǵa sot úkimi shyqty, dep habarlaidy ult.kz.
Polisia.kz málimetinshe, jasy 20 men 25 aralyǵyndaǵy kúdiktiler ótken jyldyń shilde aiynda ustalǵan. Tergeý barysynda olardyń internet-alaiaqtyqtyń 31 epizodyna qatysy bary anyqtaldy.
Tergeý derekterine sáikes, shetelde otyrǵan alaiaqtar qazaqstandyqtarǵa uialy bailanys operatorlarynyń, bank qyzmetkerleriniń jáne túrli uiymdardyń atynan habarlasqan. Olar azamattardy SMS arqyly kelgen kodtardy aitýǵa kóndirip, keiin qarjylaryna qaýip tónip turǵanyna sendirgen.
Odan ári jábirlenýshilerdiń atyna iri kólemde nesie rásimdelip, qarajat «qaýipsiz shottarǵa» aýdarylǵan. Alaida bul shottar arnaiy tartylǵan droptardyń atyna rásimdelgen bolyp shyqqan. Keiin aqsha sol shottar arqyly shetelge shyǵarylyp otyrǵan.
Tergeý málimetinshe, sottalǵan bes adam dál osy droptardy taýyp, olardy qylmystyq shemaǵa tartýmen ainalysqan. Árbir qarjylyq operatsiiadan belgili bir paiyz alyp otyrǵan.
Sot olardy alaiaqtyqqa járdemdesti dep tanyp, 2 jyldan 6 jyl 8 aiǵa deiingi merzimge bas bostandyǵynan aiyrdy.
Sonymen qatar jábirlenýshilerdiń azamattyq talaptarynyń bir bóligi qanaǵattandyryldy. Sottalǵandar birneshe epizod boiynsha keltirilgen materialdyq shyǵyndy óteýge mindetteldi. Isterdiń birinde keltirilgen zalal kólemi 22 million teńgeden asqan.
Qalǵan talaptar azamattyq sot isin júrgizý tártibimen qaralýy múmkin. Ázirge sot úkimi zańdy kúshine engen joq.
