Foto: Ashyq derekkóz
2026 jyldyń 1 qańtarynan bastap qurylys kompaniialary 16% mólsherinde qosylǵan qun salyǵyn (QQS) tóleýge mindetteledi. Osy ózgeris qarsańynda qazaqstandyqtar páterdi 2025 jylǵy baǵamen satyp alýǵa asyǵyp otyr. Ult.kz tilshisi naryqty zertteýshi, «Ui Alaiyq» kompaniiasynyń negizin qalaýshy Madina Bolathanqyzymen 2026 jyl turǵyn úi baǵasyna qatysty boljamyn surap kórdi.
Baǵanyń ósýi: kúrt emes, tańdamaly
Naryqtaǵy baǵalaýlarǵa sáikes, 2026 jyl turǵyn úi baǵasy kúrt ósetin kezeń bolmaidy. Bul — naryqtyń beiimdelý jáne qaita teńgerilý jyly. Baǵa ósimi jappai emes, tańdamaly sipat alady.
Ótimdi, suranysy joǵary jobalarda baǵa ósýi múmkin;
Orta segmentte baǵa turaqtaýy yqtimal;
Shekten tys qymbattaǵan obektilerde túzetý júrýi ǵajap emes.
Satyp alýshylardyń talǵamy artqan: qazir sheshim páterdiń sapasy men ekonomikalyq tiimdiligine negizdeledi. Sarapshynyń aitýynsha, turǵyn úi naryǵy uialy qarjylandyrý, memlekettik baǵdarlamalar men suranysqa tikelei bailanysty.
Madina Bolathanqyzy. Foto: Áleýmettik jeliden
Baǵanyń tómendeýi múmkin emes
«Úi baǵasy aitarlyqtai arzandaidy dep aitý qiyn, kerisinshe, baǵa tómendemei, óz deńgeiinde saqtalyp otyr. Bul eń aldymen paiyzdyq mólsherlemelerge bailanysty.
Ulttyq bank bazalyq mólsherlemeni belgili bir deńgeide ustap turǵanymen, qazirgi jaǵdaida halyq úshin úi alý jeńildep ketti dep aitýǵa bolmaidy. Sebebi biyl ipotekalyq nesieler boiynsha talaptar aitarlyqtai qatańdady. Otbasy bankinen ózge bankterdiń barlyǵynda derlik nesie mólsherlemeleri ósti. Tipti Otbasy bankinde de komissiialar men qosymsha tólemder artty, bul turǵyn úi alý qunyn janama túrde qymbattatýda.
Bastapqy naryqqa kelsek, jańa úilerdiń baǵasy qurylys materialdarynyń qymbattaýyna tikelei táýeldi. Qurylysqa qajetti materialdardyń basym bóligi importtalady, al olardyń baǵasy valiýta baǵamyna bailanysty. Budan bólek, jumys kúshi, jańa tehnologiialar men logistika shyǵyndary da ósip otyr. Osy faktorlardyń barlyǵy turǵyn úi baǵasynyń tómendeýine jol bermeidi.
Qaitalama naryqta baǵanyń birshama ósýi múmkin, alaida kúrt qymbattaý kútilmeidi. Bul – qazirgi naryqtaǵy naqty kórinis. Sonymen qatar, bankter tarapynan komissiialyq tólemderdiń áli de ósý yqtimaldyǵy bar», – deidi Madina Bolathanqyzy.
Jańa qurylystardaǵy baǵaǵa áser etetin faktorlar
Jańa qurylystardaǵy baǵaǵa áser etetin negizgi faktorlar:
Qurylys materialdarynyń qymbattaýy;
Salyq júktemesiniń artýy;
Qaryz qarajatynyń qymbat bolýy.
Alaida bul faktorlar barlyq jobada birdei baǵa ósimine alyp kelmeidi. Baǵany negizinen iri ári senimdi kompaniialar ǵana kótere alady.
Suranys jáne naryqtaǵy segmentter
«Suranys máselesi árqashan saqtalady. Ekonom, komfort nemese biznes-klass bolsyn – ár sanatta óz satyp alýshysy bar.
Ekonom jáne ekonom-komfort segmentinde suranys joǵary, kóbine memlekettik baǵdarlamalar arqyly alǵash ret úi alyp jatqan azamattarǵa bailanysty.
Biznes-klass turǵyn úilerine de suranys bar, biraq negizinen tólem qabileti joǵary adamdar esebinen qalyptasady. Qolma-qol tólem jasalǵan jaǵdaida keide baǵany kelisý múmkindigi bar.
Qorytyndylai kele, turǵyn úi baǵasy arzandaidy dep kútý orynsyz. Baǵanyń ýaqytsha turaqtaýy múmkin, biraq tómendeý bolmaidy. Eń bastysy – bastapqy jarnasy bar, tólem qabiletti azamattar úshin naryq árqashan ashyq. Al talaptar qatańdaǵan saiyn, bankterden tómen mólsherlememen nesie alý úshin aldyn ala qarjylyq daiyndyq qajet», – dep atap ótti Madina Bolathanqyzy.
QQS engizý áseri
QQS engizilýi developerlerdiń baǵa saiasatyna ártúrli yqpal etedi:
Bir bóligi baǵany 5–8% kóterýi múmkin;
Keibiri tabystylyǵyn qysqartyp, baǵany ustap turady;
Álsiz kompaniialar jeńildikter usynýǵa májbúr bolady.
Qorytyndysynda, 16% QQS turǵyn úi naryǵynda kúrt ózgeris emes, kezeń-kezeńimen beiimdelý protsesin qalyptastyrady. 2026 jyly qosylǵan qun salyǵynyń ósýi halyqty baspanaǵa «aldyn ala» suranysty arttyrýǵa itermeledi, al qurylys kompaniialary satylymdy jedeldetýge tyrysty.
Aqbota Musabekqyzy
