Foto: pixabay.com
Álemdik ekonomika qubylǵan saiyn investorlar úshin «qaýipsiz ailaq» sanalatyn altynǵa suranys azaimai tur. 2026 jylǵa qarai bul metalldyń baǵasy qalai ózgeredi? Osy oraida Ult.kz tilshisi bul suraqty ekonomist, qarjy sarapshysy Marat Abdrahmanovqa qoiyp kórdi.
Jahandyq faktorlar: altyndy joǵary ustap turǵan ne?
Sarapshynyń aitýynsha, aldaǵy jyly altyn baǵasyna birinshi kezekte álemdik suranys pen geosaiasi turaqsyzdyq áser etpek. Sońǵy jyldary álemdik naryqta belgisizdik artqan saiyn altynǵa degen qyzyǵýshylyq ta kúsheie tústi.
«Basty faktor – jahandyq suranystyń joǵary bolýy. AQSh-taǵy biýdjet tapshylyǵy, álemdegi ekonomikalyq qubylmalyq, bári altynǵa degen qyzyǵýshylyqty arttyryp otyr», – deidi ekonomist Marat Abdrahmanov.
Ekonomisterdiń kópshiligi AQSh-taǵy qaryz limiti men biýdjet tapshylyǵy syndy problemalar altyn baǵasyn shegere túsetinin aityp keledi. Óitkeni investorlar táýekel kúrt ósken jaǵdaida dál osy metalǵa bet burady.
Infliatsiia jáne uzaq merzimdi investitsiia
Jahandyq infliatsiia da altyn naryǵyna tikelei yqpal etedi. Infliatsiia joǵarylaǵan saiyn dollardyń satyp alý qabileti tómendeidi, sol sebepti investorlar aktivterin saqtap qalý úshin altynǵa aýystyrǵandy jón kóredi. 2026 jyly altyndy uzaq merzimge ustaý tiimdi me degen suraqqa sarapshy:
«Iá, uzaq merzimde altyn – turaqty aktiv. Kelesi jyly onyń óziniń qorǵanys retindegi róli saqtalady», – dep jaýap beredi.
Ekonomistiń aitýynsha, 2026 jyly altyn baǵasy bir ýntsiia úshin shamamen 5000 dollar deńgeiin synap kórýi múmkin. Bul – óte batyl boljam. Degenmen sarapshynyń pikirinshe, mundai kórsetkishke jetýge birneshe faktor áser etedi:
geosaiasi shielenistiń kúsheiýi;
álemdik ekonomikadaǵy báseńdeý;
AQSh Federaldy rezerv júiesiniń paiyzdyq mólsherlemeni uzaq ýaqyt joǵary ustaýy;
damýshy elderdiń altyn qoryn arttyrýy.
Qazaqstan rezervi jáne ulttyq valiýta
Qazaqstannyń da altyn-valiýta rezervindegi ózgerister halyqtyń qyzyǵýshylyǵyn týdyrýda. Bul rezervtiń artýy – ekonomikanyń turaqty ekenin bildiredi, al azaiýy ulttyq valiýtaǵa qosymsha qysym túsirýi múmkin.
«Qazirgi kezde Qazaqstannyń altyn qory salystyrmaly túrde turaqty. Onyń kólemindegi ózgerister teńgeniń uzaq merzimdi baǵamyna áser etýi múmkin, biraq qysqa merzimdi ózgeristerge tikelei bailanys joq», – deidi sarapshy Marat Abdrahmanov.
2026 jyly altynǵa investitsiia jasaýdyń táýekeli qandai? Sarapshy munda eki túrli faktordy atap ótti:
1. Syrtqy faktorlar: geosaiasi ahýal, álemdik naryqtaǵy qubylys, dollardyń kúsheiýi.
2. Ishki faktorlar: Qazaqstan biýdjetiniń turaqtylyǵy, qarjy naryǵynyń jaǵdaiy.
«Belgisizdik kezeńinde altyn qaýipsiz aktiv retinde mańyzdy ról atqarady. Biraq ár investor táýekelin ólshep áreket etkeni jón», – deidi ekonomist Marat Abdrahmanov.
Altynǵa qyzyǵýshylyq arta ma?
Sarapshynyń pikirinshe, halyq arasynda altynǵa degen suranys 2026 jyly da óse beredi. Óitkeni ekonomikalyq turaqsyzdyq kúsheigen saiyn altynǵa degen senim de joǵarylaidy.
«Álemdik naryq qubylsa, altynǵa qyzyǵýshylyq kúsheiedi. Bul – tabiǵi úrdis», – deidi sarapshy.
2026 jyl altyn naryǵy úshin týrbýlentti kezeń bolmaq. Sarapshylardyń boljamy boiynsha, altyn baǵasy joǵary deńgeiin saqtai otyryp, kei tusta jańa tarihi shekterdi baǵyndyrýy da múmkin. Qazaqstandyq investorlar úshin de bul aktiv áli de «qaýipsiz ailaq» rólin atqaryp tur. Ekonomist aitqandai, altyn qysqa merzimde qubylmaly bolǵanymen, uzaq merzimde óz qunyn joǵaltpaityn aktiv. Osy turǵydan alǵanda, 2026 jyl altynǵa qyzyǵýshylyqtyń artýymen este qalatyn kezeń bolýy yqtimal.
Aqbota Musabekqyzy
