Foto: Gov.kz
«2026–2028 jyldarǵa arnalǵan respýblikalyq biýdjet týraly» Zańǵa sáikes, 2026 jylǵy 1 qańtardan bastap memlekettik járdemaqylardyń barlyq túri, bazalyq jáne yntymaqty zeinetaqylar 10%-ǵa arttyrylady. Ósim mólsheri QR Ulttyq Banki aiqyndaityn infliatsiianyń boljamdy deńgeiine sai júzege asyrylady, dep habarlaidy Ult.kz.
Sonymen qatar Memleket basshysynyń tapsyrmasyna sáikes, 2023 jyldan bastap bes jyl ishinde bazalyq zeinetaqynyń eń tómengi mólsherin eń tómengi kúnkóris deńgeiiniń 70%-yna, al eń joǵarysyn 120%-yna deiin kezeń-kezeńimen arttyrý kózdelgen.
Osyǵan bailanysty 2026 jylǵy 1 qańtardan bastap bazalyq zeinetaqynyń eń tómengi mólsheri 35 596 teńgeni, al eń joǵary mólsheri 60 005 teńgeni quraidy. Bul eń tómengi kúnkóris deńgeiiniń 118%-yna teń.
Mysaly, 2019 jyly zeinetke shyqqan, búginde 70 jastaǵy zeinetkerdiń 2025 jylǵy jalpy zeinetaqysy 171 588 teńge bolsa, 2026 jylǵy indeksatsiiany eskere otyryp, onyń zeinetaqysy 192 816 teńgege deiin ulǵaiady. Onyń ishinde bazalyq zeinetaqy – 60 005 teńge, yntymaqty zeinetaqy – 132 811 teńge. Bul somaǵa BJZQ-dan tólenetin tólemder kirmeidi.
Sondai-aq 2026 jyldan bastap memlekettik járdemaqylardyń mólsheri de ósedi. Atap aitqanda:
1, 2, 3 bala týǵan kezde beriletin járdemaqy 149 416 teńgeden 164 350 teńgege deiin,
4 jáne odan da kóp bala týǵan kezde 247 716 teńgeden 272 475 teńgege deiin artady;
4 balasy bar kópbalaly otbasylarǵa beriletin járdemaqy 63 030 teńgeden 69 330 teńgege deiin,
10 balasy bar otbasylarǵa 157 280 teńgeden 173 000 teńgege deiin ósedi;
I toptaǵy múgedektigi bar adamdarǵa beriletin járdemaqy 101 702 teńgeden 111 872 teńgege deiin,
II toptaǵylarǵa 81 362 teńgeden 89 498 teńgege deiin,
III toptaǵylarǵa 55 474 teńgeden 61 021 teńgege deiin ulǵaiady.
Budan bólek, Memlekettik áleýmettik saqtandyrý qorynan tólenetin asyraýshysynan aiyrylý jáne eńbekke qabilettiliginen aiyrylý boiynsha tólemder de 10%-ǵa artady. Bul tólemder mindetti áleýmettik saqtandyrý júiesine qatysýshylarǵa qosymsha retinde tólenedi.
Tólemderdiń naqty mólsheri sońǵy eki jyldaǵy ortasha ailyq tabysqa, áleýmettik aýdarymdar kólemine, eńbekke qabilettiliginen aiyrylý deńgeiine, asyraýyndaǵy adamdar sanyna jáne júiege qatysý ótiline bailanysty jeke esepteledi.
