Foto: Májilis baspasóz qyzmeti
29 jeltoqsanda Parlamenttiń tómengi palatasy biylǵy jyldyń sońǵy jalpy otyrysyn ótkizdi. Jańa 2026 jylǵa aiaq basqan besinshi shaqyrylym depýtattary 2025 jylda qandai jumystar atqardy? Muny Ult.kz tilshisi májilismenderdiń ózderinen surap bildi.Azat Perýashev: «Pikirimizben Úkimet sanaspady»
Májilis depýtaty Azat Perýashev biylǵy jyl partiia úshin de, el úshin de ońai bolǵan joq dep esepteidi. Perýashev elimizde «Salyq Kodeksin» qabyldaýdyń ózi kóp máseleler týdyryp, qarsylyqqa ushyraǵanyn aitty.
Foto: parlam.kz
«Bizdiń fraktsiia Úkimettiń biraz usynystaryna qarsy daýys berdi. Onyń ishinde osy «Salyq Kodeksi», «2024 jylǵy biýdjettiń atqarylýy týraly» Úkimet esebine jáne «Qurylys Kodeksine» qarsy daýys berdik. Budan bólek, «Ákimshilik quqyq buzýshylyq týraly» zańǵa jáne basqa da biraz máseleler boiynsha óz kózqarasymyzdy bildirdik. Bul bizdiń kúndelikti jumysymyz. Biraq, ókinishke qarai bizdiń kóp usynysymyz ben pikirlerimizben Úkimet sanaspai, «Salyq Kodeksin» qabyldady.
Konstitýtsiialyq zańda Parlament týraly bylai jazylǵan: «Biýdjettik kiris máseleleri boiynsha Parlament depýtattary tek qana Úkimetpen maquldanǵan usynystardy qarastyrýǵa quqyly». Sol sebepti bul máselege núkte qoiatyn Úkimettiń ózi. Aldyńkúni ǵana men «Salyq Kodeksi» týraly sóz sóiledim. Sony durystap sheshýdi talap etsem, kúngi keshe ǵana Úkimet baspasóz konferentsiiasyn ótkizip, qaitadan óz pozitsiiasyn bekitti», ‒ dedi depýtat.
Dese de májilismen Salyq Kodeksiniń qabyldanýyna tikelei muryndyq bolǵan Ulttyq ekonomika ministriniń jumysyn joǵary baǵalap otyr.
«Menińshe Jumanǵarin myrza erkek retinde, memlekettik qyzmetker retinde óte kóp jumys istedi. Ol barlyq jaýapkershilikti óz moinyna aldy», ‒ dedi ol.
Azat Perýashevtiń pikirinshe 2025 jyl ózi basqaratyn «Aq Jol» partiiasy úshin de, ózi úshin de óte qiyn bolǵan. Biraq ótken jyl jaqsy oqiǵalarymen de este qaldy.
«Sebebi bizdiń biznes qaýymdastyǵy da piskenin kórip otyrmyz. Biryńǵai ortaq pikirge kelip, quqyǵymyzdy qorǵaýǵa múmkindigimiz boldy. Birte-birte Úkimet Parlamenttiń pikirimen, qoǵamnyń pikirimen sanasýǵa májbúr bolyp jatyr. Jalpy durys jolmen kele jatyrmyz, kelesi jyly budan da jaqsy bolsyn!» ‒ dedi depýtat Perýashev.
Nartai Sársenǵaliev: «Armanym halyq tabysynyń qazirgiden de kóterilýi»
Májiliste jii másele kóteretin belsendi depýtattardyń biri Nartai Sársenǵalievtan qansha depýtattyq saýal joldaǵanyn suraǵanymyzda, ol tosylyp qaldy da, aiyna kemi 2 depýtattyq saýal joldaityn azamat retinde «az bolmaǵan shyǵar» dep topshylady.
Foto: Májilis baspasóz qyzmeti
«Depýtattyq saýaldardy esepteýdiń eki kategoriiasy bolady. Ol ‒ basqa azamattarǵa qosylsań da, jeke saýal joldasań da seniń saýalyń bolady. Sondyqtan ony eseptep shyǵarý kerek. Biraq depýtattyq saýaldyń sanymen emes, onyń júzege asqanyn esepteý kerek qoi dep oilaimyn», ‒ deidi depýtat Sársenǵaliev.
Nartai Sársenǵaliev 2025 jyly qandai depýtattyq saýalynyń nátijesin kórip, sheshimine qol jetkizgenin aityp berdi. Onyń sózine qaraǵanda jyl jemisti bolǵanǵa uqsaidy.
«Shekaralyq aimaqtar týraly saýal joldap, Oral qalasynan 500 shaqyrym jerdegi Bókei ordasy aýdanyna komitet pen 4-5 vitse-ministrmen bardyq, talqyladyq, depýtattyq saýal joldadym, standartqa sáikes bolmai jatsa da mektepterdi saqtap qalý kerek dedim. Sol depýtattyq saýaldan keiin Batys Qazaqstan oblysynda 13 mektepti alyp qaldym. Bul da bir úlken jetistigim jáne sol jumystyń nátijesi boiynsha zań jobasy daiyndaldy. Sol zań jobasynyń avtorlarynyń biri bolamyn.
Sport týraly zańym shyqty, bilesizder. Sonyń nátijesinde 15, 20, tipti 30 jyl el aityp kele jatqan talap otyryndaldy. Ózim sol normanyń avtorymyn jáne sol jumys tobynyń jetekshisimin. Iaki, memlekettik biýdjettiń esebinen Qazaqstan Respýblikasynyń azamaty emes azamattarǵa, iaǵni legionerlerdi qarjylandyrý toqtatyldy, kvazimemlekettik sektorlardan qarjylandyrý toqtatyldy.
15-20 jyldan beri sporttyq mekemelerdi basqaryp otyrǵan adamdardyń bárin rotatsiiaǵa ushyrattyq. Olardyń barlyǵy 5 jyldan artyq qyzmetinde otyra almaityn boldy. Jáne bir sportqa birneshe federatsiia ashyp alyp, shalqyp júrgenderdiń barlyǵyn toqtattyq ta, «bir sport túrine ‒ bir federatsiia» dedik. Sosyn búgingi kúnge deiin ministrlik 180 sport túrine memlekettiń aqshasyn taratyp berip otyrsa, ony biz tek olimpiada, paralimpiada, sýrdlimpiada, Aziiada, paraziada, ulttyq sport túrleri dep alpys-aq sport túrin qarjylandyratyn deńgeige túsirdik.
Birinshi top múgedekterin alyp júretin tulǵa degen kategoriia engizdik. Birinshi top múgedegi jarysqa baratyn bolsa, onyń qasynda jaqyny barýy kerek. Onyń baryp kelýi, tamaǵy barlyǵy biýdjet esebinen tólenýi kerek dep, osyndai úlken normalardy biz qabyldadyq, júzege asyryp jatyrmyz. Bul da bizdiń úlken jemisimizdiń biri ǵoi dep oilaimyn», ‒ deidi depýtat.
Budan bólek depýtat sport salasyndaǵy taǵy basqa zańnamalar men BAQ-qa salynatyn salyq, Qurylys Kodeksindegi normalarǵa qatysty eleýli nátijege qol jetkizgenin aityp ótti.
Degenmen Nartai Sársenǵaliev jyldy jaqsy ótti dep emes, «jaman emes» dep baǵalady. Onyń armany aldaǵy jyly halyq tabysynyń qazirgiden de kóterilýi eken. Sol kezde múmkin «jyl jaqsy ótti» dep aitatynyn jetkizdi.
Murat Ábenov: «Óte mańyzdy zańǵa ózgeris engize aldym»
Al Májilis depýtaty Murat Ábenov kerisinshe depýtattyq saýaldardy kóp joldamaitynyn aitty. Biraq 2025 jylda istelgen jumystaryna qanaǵattanyp otyr.
Foto: Májilis baspasóz qyzmeti
«Biylǵy jylǵa óte qatty kóńilim tolady. Usynys jasap, ony sońyna deiin aparyp, óte mańyzdy zańdy ózgerte aldym. Jalpy ózim shynyn aitsam, depýtattyq saýaldardy kóp joldai bermeitin adammyn. Meniń tájiribem mol. Eger biz, zań shyǵarýshy organdar ózimiz ózgeris engize alsaq, depýtattyq saýal joldap ne kerek? Biyl men bank salasy týraly zań jobasyna shamamen 38 ózgeris engizdim. Ol onlain kredit pen bankterdiń jaýapkershiligin arttyrý týraly. Endi sen onlain kredit alý úshin mindetti túrde barnkke baryp, kelisimshart jasasyp, fotoǵa túsip, qol qoiýyń kerek. Qansha jyl urylar halyqty aldap keldi.
Budan bólek «Qurylys Kodeksin» qabyldap, qatań normalar engizdik. Buryn «Qurylys Kodeksi» birshama lobbistik bolǵan. Qazir ákimderge bas jospardy bekitip, qoǵamǵa bildirmei bizneske jer berýge quqyǵy joq. Biz memlekettik baqylaýdy qaitaryp, sapa kepilin 10 jylǵa deiin kóterdik. Biz meditsinaǵa memlekettik baqylaýdy qaitardyq. Ony da 5 jyl buryn zańnan alyp tastaǵan», ‒ degen ol qabyldanǵan zańdardyń nátijesin qazirdiń ózinde kórip jatqanyn aitty.
Aldaǵy jyly Murat Ábenov tutynýshylardyń quqyǵyn qorǵaý, aviatsiia salasy men «Eńbek Kodeksine» ózgeris engizý boiynsha jumys isteitinin jetkizdi.
