2021 jyldyń 10 aiynda munai-gaz-himiia ónimderiniń óndiris kólemi 147 myń tonnany qurady. Bul týraly Úkimet otyrysynda QR Energetika ministri Maǵzum Myrzaǵaliev aitty, dep habarlaidy QazAqparat.
«2021 jyly munai-gaz-himiia ónimderin óndirý boiynsha 2 joba paidalanýǵa berildi. Olar: qýaty jylyna 57 myń tonna bolatyn benzinge arnalǵan oktan kóteretin qospa shyǵaratyn zaýyt; qýaty 57 mln tekshe metr azot jáne 34 mln tekshe metr qurǵaq syǵylǵan aýa óndiretin tehnikalyq gaz shyǵarý zaýyty. 2022 jyly qýaty jylyna 500 myń tonna polipropilen óndiretin zaýytty paidalanýǵa berý josparlanǵan. Búgingi tańda qurylys-montajdaý jumystary júrgizilýde. Jobany iske asyrýdyń jalpy progresi 96 paiyzdy quraidy», - dedi óńdeý ónerkásibin damytý týraly baiandaǵan ministr.
Onyń atap ótýinshe, munan bólek, 2025 jylǵa deiin eki zaýyttyń qurylysyn aiaqtaý josparlanýda. Atap aitqanda Atyraý oblysynda qýaty jylyna 430 myń tonna polietilentereftalat óndiretin zaýyt pen Batys Qazaqstan oblysynda qýaty jylyna 130 myń tonna metanol óndirý zaýyty paidalanýǵa beriledi.
«Joǵaryda kórsetilgen jobalardy iske asyrý 2025 jylǵa qarai shyǵarylatyn munai-gaz-himiia óniminiń kólemin 2 mln tonnaǵa deiin ulǵaitýǵa múmkindik beredi. Al tartylǵan investitsiialar somasy 1,2 trln teńgeni quraityn bolady», - dedi Maǵzum Myrzaǵaliev.
