QR Premer-Ministri Asqar Mamin Úkimet otyrysynda múmkindigi shekteýli jandardy áleýmettik qorǵaý jóninde tapsyrmalar berdi, dep habarlaidy QazAqparat.
«Tuńǵysh Prezident qorynyń bastamasymen salynyp jatqan 8 balalardy ońaltý ortalyǵyn biylǵy jyl sońyna deiin ashý josparlanǵan. 3 ortalyqty memlekettik-jekeshelik áriptestik aiasynda ashý boiynsha jumys júrgizilip jatyr. Bul múgedekterdi meditsinalyq ońaltýmen qamtý úlesin biyl 60% deiin, kelesi jyly 75% deiin arttyrýǵa múmkindik beredi. Jalpy, múmkindikteri shekteýli adamdardy qoldaý boiynsha sharalar keshenin iske asyrýdy jalǵastyrýymyz kerek», - dedi Premer-Ministr.
A. Mamin Eńbek jáne áleýmettik qorǵaý ministrligine kelesi jyly muqtaj adamdardy tehnikalyq ońaltý quraldarymen qamtýdy 80 paiyzǵa jáne 2025 jyly 100 paiyzǵa deiin ulǵaitýdy tapsyrdy.
«Ekinshi, 2021 jyldan bastap Áleýmettik qyzmetter portaly tolyq iske qosylatyn bolady. Osy rette, ákimdikter múgedektigi bar adamdardy Portal arqyly ońaltý quraldaryn alý daǵdylaryna belsendi túrde oqytýy qajet.
Tsifrlyq damý ministrligimen birlesip, Jumyspen qamtý ortalyqtary men Halyqqa qyzmet kórsetý ortalyqtarynda múgedektigi bar adamdar úshin ózine-ózi qyzmet kórsetý alańdaryn kóbeitsin. Úshinshi, Densaýlyq saqtaý ministrligi ákimdiktermen birlesip, múgedektiktiń aldyn alý úshin syrqattarǵa diagnostikany erte júrgizýge kóńil bólip, múgedektigi bar adamdarǵa ońaltý kómegin kúsheitsin, salynyp jatqan barlyq ońaltý ortalyqtaryn ýaqytyly paidalanýǵa berýdi qamtamasyz etsin», - deidi A. Mamin.
Tórtinshiden, Bilim ministrligi ákimdiktermen birlesip, kelesi jyly balalardy inkliýzivti bilim berýmen qamtýdy 50 paiyzǵa deiin keńeitýi kerek. Bilim berý baǵdarlamalarynyń mazmunyn jáne pedagogtardy daiarlaýdy inkliýzivti bilim berýdiń engizilýin eskerip jańartý qajet.
Túzeý kabinetteri jelisi men psihologiialyq-meditsinalyq jáne pedagogikalyq komissiialardyń qyzmetin keńeitý sharalary qabyldanýy qajet.
«Besinshi, Indýstriia ministrligi memlekettik organdarmen jáne ákimdiktermen birlesip, múgedektigi bar adamdar úshin kedergisiz orta jasaý jumysyn jalǵastyrsyn jáne obektilerdiń ásirese, kólikte qoljetimdiligin baqylaýdy kúsheitsin. Múmkindigi shekteýli adamdarǵa qyzmet kórsetý talaptaryna sáikes vokzaldardy jańartýdy aiaqtaý qajet. Qoǵamdyq avtobýs parkterin belgilengen talaptarǵa sáikes keltirý boiynsha túbegeili sharalar qabyldaý qajet, bul ásirese jumys qarqyny baiaý óńirlerge qatysty. Jyl aiaǵyna deiin múmkindigi shekteýli adamdarǵa kedergisiz ortany 100 paiyz qamtamasyz etý boiynsha Jol kartasyn ázirlesin», - dep tapsyrma berdi Asqar Mamin.
