QR Premer-Ministri Álihan Smaiylovtyń tóraǵalyǵymen ótken Úkimet otyrysynda Jekeshelendirýdiń 2021-2025 jyldarǵa arnalǵan keshendi josparyn oryndaý barysy qaraldy, dep habarlaidy "Ult aqparat" primeminister.kz saityna silteme jasap.
Premer-Ministrdiń orynbasary – qarjy ministri Erulan Jamaýbaev Keshendi josparǵa 675 memlekettik menshik jáne kvazimemlekettik sektor nysany kiretinin baiandady. Onyń ishinde 7 respýblikalyq jáne 250 kommýnaldyq menshik obektisi, 262 ulttyq holdingter men kompaniialar obektisi, sondai-aq shamamen 150 ÁKK obektisi bar.
Búgingi tańda 141,7 mlrd teńge turatyn 253 obekt básekelestik ortaǵa berildi, 60 obekt qaita uiymdastyrýǵa jáne jabylýǵa baǵyttalǵan, 146 obekt – saýda-sattyqta jáne taǵy 216 obekt – satý aldyndaǵy daiyndyqta. Satý, qaita uiymdastyrý jáne jabý boiynsha Keshendi jospardyń oryndalýy 46%-dy quraidy.
Ulttyq ekonomika ministri Álibek Qýantyrovtyń aitýynsha, jekeshelendirý tizbesin keńeitý úshin aktivterdi irikteý kriteriileri bekitildi, olardyń ishinde aktsiialardyń baqylanbaityn paketin ielený jáne qyzmettiń negizgi kórsetkishterine qol jetkizbeý, sondai-aq monopoliiaǵa qarsy organnyń básekelestik ortaǵa berý jónindegi usynysynyń bolýy jáne taýar naryǵynda qatysýdyń usynylǵan merziminiń bastalýy bar. Osy kriteriiler negizinde Keshendi josparǵa 170-ten astam nysan qosylyp, ózektendirildi. Sonymen qatar jekeshelendirý kezinde memlekettiń múddelerin saqtaý úshin strategiialyq uiymdardaǵy baqylaý úlesterin saqtaý kózdelgen.
Sonymen qatar búginde kommýnaldyq kásiporyndardy jekeshelendirý tásili qaita qaraldy. Máselen, jospardan halyqtyń tirshiligin qamtamasyz etý úshin mańyzdy 200-den astam áleýmettik mańyzy bar obekti (sýmen, elektrmen jáne jylýmen jabdyqtaý) alynyp tastaldy.
«Samuryq-Qazyna» UÁQ» AQ basqarma tóraǵasy Almasadam Sátqaliev baiandama jasady.
Premer-Ministr jekeshelendirý máseleleri memlekettik organdardyń birinshi basshylarynynyń erekshe baqylaýynda bolýy tiis ekenin atap ótti.
«Keshendi jospardy iske asyrý 2025 jylǵa qarai memlekettiń ekonomikadaǵy úlesin 14%-ǵa deiin qysqartýǵa múmkindik beredi. Satýǵa qoiylǵan árbir obekt boiynsha Jol kartasy ázirlendi. Olar memlekettik múlik tiziliminiń veb-portalynda ornalastyrylǵan. Aktivterdi básekeles naryqqa josparly túrde shyǵarýdy qamtamasyz etý qajet», — dedi Álihan Smaiylov.
Sonymen qatar, Úkimet basshynyń aitýynsha, obektilerdiń satý aldyndaǵy daiyndyq sapasyna da kóbirek kóńil bólý kerek. Keshendi jospardy tolyqqandy iske asyrý úshin jekeshelendirý protsesiniń ashyqtyǵyn arttyrý qajet.
«Memlekettik organdar, óńir ákimdikteri, kvazimemlekettik sektor uiymdary jospardy naqty oryndaýy qajet. Jyl qorytyndysy boiynsha jumystaryńyzǵa tiisti baǵa beriletin bolady», — dedi Álihan Smaiylov.
Qorytyndylai kele, Premer-Ministr «Samuryq-Qazyna» qoryna «QazMunaiGaz» ulttyq kompaniiasynyń IPO-syn sapaly ótkizýdi qamtamasyz etýdi, al Qarjy ministrligine Keshendi jospar obektileriniń satylýyna baqylaýdy kúsheitýdi tapsyrdy.
