2025 jylǵa deiin Túrkistan oblysy eldi mekenderiniń 99 paiyzy gazben qamtamasyz etiledi. Bul týraly búgin Úkimet otyrysynda Túrkistan oblysynyń ákimi Ómirzaq Shókeev aitty, dep habarlaidy "Ult aqparat".
«Qazirgi tańda oblystyń 1 mln 152 myń turǵyny bar eldi mekenderi tabiǵi gazben qamtamasyz etilgen. Biyl 43 nysannyń qurylysy júrdi. Onyń 20-sy aiaqtaldy, 23-i kelesi jylǵa ótpeli. Túrkistan oblysyn damytýdyń 2025 jylǵa deiingi keshendi jospary bar. Sol josparda 2025 jylǵa deiin eldi mekenderdi 99 paiyz gazben qamtamasyz etý josparlanǵan. Kelesi jylǵa Energetika ministrligimen birlesip, biýdjettik ótinim usynyldy. 4,3 mlrd teńgege 7 nysandy gazdandyrý qarastyrylǵan. Taǵy 52 nysandy gazdandyrýǵa daiynbyz. Sondyqtan bul qurylystardy bastaýǵa taǵy qarjy kerek bolady. Oǵan qosymsha ótinim jasaimyz», - dedi oblys basshysy.
Sonymen qatar ol óńirdegi gaz qubyrlary «QazTransGaz» AQ-qa senimgerlik basqarýǵa berilip jatqanyn aitty.
«Qazirgi ýaqytta qurylysy bitken 298 nysannyń 110-y qazan aiynda senimgerlik basqarýǵa berýge daiyn bolǵan edi. Onyń 30 berildi. Búginde 140 nysan daiyn tur. Qalǵan 84 nysan problemaly bolatyn. Jyldyń sońyna deiin olardyń qujattaryn daiyndap beremiz. Energetika ministrligimen birge jumys istep jatyrmyz. Tapsyrmany oryndaýǵa tolyq múmkinshilik bar», - dedi Ómirzaq Shókeev.
