Qarjy ministrligi "2023-2025 jyldarǵa arnalǵan respýblikalyq biýdjet týraly" zań jobasyn talqylaýǵa shyǵardy. "Ashyq NQA" saitynda jariialanǵan qujatta keler jylǵa bekitiletin eń tómengi jalaqy men zeinetaqynyń mólsheri jariialandy, - dep habarlaidy "Ult aqparat".
Jobaǵa sáikes, 2023 jyldyń 1 qańtarynan bastap:
- jalaqynyń eń tómengi mólsheri - 60 000 teńge;
- memlekettik bazalyq zeinetaqy tóleminiń eń tómengi mólsheri - 21 907 teńge;
- zeinetaqynyń eń tómengi mólsheri - 53 076 teńge;
- Járdemaqylardy jáne ózge de áleýmettik tólemderdi esepteý, sondai-aq Qazaqstan Respýblikasynyń zańnamasyna sáikes aiyppul sanktsiialaryn, salyqtardy jáne basqa da tólemderdi qoldaný úshin ailyq eseptik kórsetkish - 3 450 teńge;
- bazalyq áleýmettik tólemderdiń mólsherin esepteý úshin eń tómengi kúnkóris deńgeiiniń shamasy - 40 567 teńge.
Budan basqa, qujatqa sáikes, jasyna bailanysty zeinetaqy tólemderine jáne eńbek etken jyldary úshin zeinetaqy tólemderine baǵyttalǵan qarajat onyń mólsheriniń 2023 jylǵy 1 qańtardan bastap 10,5 paiyzǵa artýyn eskere otyryp belgilenedi.
Sondai-aq, ÁMSQ-ǵa tólenýge jatatyn mindetti áleýmettik meditsinalyq saqtandyrýǵa memleket jarnalarynyń mólsheri memlekettiń jarnalaryn esepteý obektisiniń 1,8 paiyzyna teń.
Zań jobasy jariia talqylaý úshin 8 qyrkúiekke deiin ornalastyrylǵan.
Aita keteiik, biyl sáýir aiynan bastap Qazaqstanda ailyq eseptik kórsetkish 3 180 teńgege deiin kóterilgen.
Memlekettik bazalyq zeinetaqy tóleminiń eń tómen mólsheri – 20 191 teńge, zeinetaqyny eń tómengi mólsheri – 48 032 teńge, al eń tómen kúnkóris deńgeii 37 389 teńgeni quraidy. Jalaqynyń eń tómengi mólsheri - 60 000 teńge.
