QR Premer-Ministri Asqar Maminniń tóraǵalyǵymen ótken Úkimet otyrysynda ádilet ministri Marat Beketaev Úkimettiń zań jobalaý jumystarynyń 2021 jylǵa arnalǵan josparyn tanystyrdy, dep habarlaidy primeminister.kz saity.
Ádilet ministrligi Zań jobalaý qyzmeti máseleleri jónindegi vedomstvoaralyq komissiia múshelerimen birlesip Úkimettiń zań jobalaý jumystarynyń 2021 jylǵa arnalǵan jospar jobasyn ázirledi.
Jospar jobasy Prezident pen memlekettiń strategiialyq qujattarynda aiqyndalǵan mindetter negizinde ázirlengen jáne 19 zań jobasyn ázirleýdi kózdeidi.
«Olar saqtandyrý jáne baǵaly qaǵazdar naryǵyn retteýge, birjalyq saýda, kólik, jer qatynastary, sybailas jemqorlyqqa qarsy is-qimyl, quqyq qorǵaý qyzmeti, geodeziia, kartografiia jáne keńistiktik derekter, volonterler qyzmeti jáne qaiyrymdylyq, innovatsiialyq jáne ǵylymi-tehnikalyq damý, biologiialyq qaýipsizdik jáne basqada salalardy odan ári damytýǵa baǵyttalǵan», — dedi ministr.
2021 jyly úsh jańa zań jobasyn ázirleý kózdelip otyr. Olar «Geodeziia, kartografiia jáne keńistiktik derekter týraly», «Áskeri politsiia organdary týraly» jáne «Qazaqstan Respýblikasynyń biologiialyq qaýipsizdigi týraly» zań jobalary.
Sondai-aq aldaǵy jyly Memleket basshysynyń 2021 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Joldaýyn iske asyrý jónindegi Jalpyulttyq is-sharalar josparynan týyndaityn eki zań jobasy Parlamentke engiziledi.
Olar «Qazaqstan Respýblikasynyń birjalyq saýdany damytý jáne jetildirý máseleleri boiynsha ózgerister men tolyqtyrýlar engizý týraly» jáne «Qazaqstan Respýblikasynyń keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgertýler men tolyqtyrýlar engizý týraly» zań jobalary.
Jospar jobasynda kózdelgen 19 zań jobanyń ishinen Parlamentke 2021 jyldyń I jartyjyldyǵynda bes, al II jartyjyldyǵynda 14 zań jobasyn engizý josparlanyp otyr.
«Quqyqtyq aktiler týraly» Zańǵa sáikes Jospar jobasy Memleket basshysymen kelisilýi tiis. Jospar jobasyn Prezident Ákimshiligine engizý usynylady.
