2021 jyly Qazaqstannyń týrizm salasyndaǵy negizgi kapitalǵa 564 mlrd teńge investitsiia salyndy. Bul týraly QR Premer-Ministriniń orynbasary Eraly Toǵjanov aityp berdi, dep habarlaidy QazAqparat.
«Búgingi tańda týrizmdi damytý eldiń áleýmettik-ekonomikalyq damýynda mańyzdy oryn alatyny belgili. Ol jai ǵana ekonomikanyń damýy ǵana emes, halyqtyń tabysyn arttyrýdyń negizgi baǵyttarynyń biri, óitkeni bul sala jumys oryndarymen de tikelei bailanysty. Sondyqtan bizdiń elimizdiń resýrstary týrizmniń barlyq túrlerin damytýǵa múmkindik beredi dep oilaimyz», - dedi E. Toǵjanov QR Mádeniet jáne sport ministrliginiń Týrizm salasy boiynsha alqa májilisinde.
Onyń aitýynsha, búginde durys uiymdastyrylǵan memlekettik saiasat pen týristik qaýymdastyqtyqtyń úilesimdi ózara is-qimyly arqasynda salaly júieli damý qamtamasyz etilip keledi.
«Onyń bári ońai bolǵan joq, pandemiiaǵa bailanysty talai kedergiler de boldy. Bul baǵytta áli de naqty jumystar júrgizýge týra keledi. Degenmen josparlanǵan biraz dúnie júzege asyrylǵanyn ózderińiz bilesizder. Nátijesinde 2021 jyly týrizm salasyndaǵy negizgi kapitalǵa salynǵan investitsiia kólemi 564 mlrd teńgeni qurady. Muny qiyn kezeńderdi eskerek bolsaq, basqa memlekettermen salystyryp qarasaq, jaqsy kórsetkish dep aitýǵa bolady, ári qarai bul baǵytty birge damytýymyz kerek», - dedi Premer-Ministr orynbasary.
Sonymen birge, spiker ótken jyly týrizm salasynda qabyldanǵan zańnamalyq ózgerister salanyń eń mańyzdy aspektilerin qozǵaityn, buryn-sońdy bolmaǵan memlekettik qoldaý sharalarymen qamtamasyz etilgenin eske saldy.
«Parlament qabyrǵasynda da talai usynystar aitylyp, talqylanǵan bolatyn. Ol jerde aitylǵan 7-8 naqty usynystar boldy, olardyń bári zańdy negizde qoldanyldy. Budan basqa, týristik salanyń investitsiialyq ahýalyn jaqsartý aiasynda týrizm salasyndaǵy investitsiialyq bastamany basym baǵyttaǵy joba dep taný shegi 2 mln ailyq eseptik kórsetkishten 200 myń AEK-ke deiin tómendetilgen bolatyn. Bul investitsiialyq jobalardy preferentsiialaý múmkindigin keńeitti», - dedi Eraly Toǵjanov.
