Elimizdiń energetikalyq qaýipsizdigin qamtamasyz etý úshin Manevrlik qýattardy damytý mindetti shart bolyp sanalady. Bul týraly QR Energetika ministrliginiń alqa májilisinde vedomstvo basshysy Nurlan Noǵaev aitty, dep habarlaidy QazAqparat.
«2021 jyly 109 mlrd kVtsaǵ elektr energiiasyn óndirý josparlanǵan. Biyl «Elektr energetikasy týraly» Zańǵa sáikes manevrlik qýattar qurylysyn yntalandyrý jáne Gidroenergetikany damytý josparyn iske asyrý jumysy jalǵasatyn bolady. Sonymen qatar, ministrlik tarapynan Qazaqstan Respýblikasy biryńǵai elektr energetikalyq júie aimaǵynda elektr stantsiiasynyń tipi, aimaq, manevrlik qýattyń qajetti kólemderin aiqyndaýmen Manevrlik generatsiialaý rejimimen generatsiialaityn qondyrǵylardy ornalastyrý jospary ázirlenip, bekitildi. Manevrlik generatsiialaý rejimimen generatsiialaityn qondyrǵylardy ornalastyrý josparymen manevrlik qýattardy salý úshin perspektivalyq alańdar anyqtaldy», - dedi ministr.
Sonymen qatar, 2021 jyldyń sońynda investitsiialyq jobalardy irikteýdiń aýktsiondyq saýda-sattyǵyn ótkizý josparlanyp otyr.
«Ósip kele jatqan elektr energiiasyn tutynýdy jáne energobalansta alternativti ári jańartylatyn energiia túrleriniń úlesin eskere otyryp, elimizdiń energetikalyq qaýipsizdigin qamtamasyz etý úshin Manevrlik qýattardy damytý mindetti shart bolyp sanalady. Sonymen qatar, biyl Smart Grid tujyrymdamasyn ázirleý jáne Biryńǵai elektr energetikasy júiesindegi tehnikalyq irkilisterge den qoiý jónindegi jedel ortalyq qurý josparlanyp otyr», - dedi vedomstvo basshysy.
