2021 jyldyń qańtardan bastap bilim salasyn basqarý júiesi ózgeredi. Bul týraly QR Bilim jáne ǵylym vitse-ministri Bibigúl Asylova aitty, dep habarlaidy "Ult aqparat".
«Ózderińizge belgili, 2021 jyldyń qańtardan bastap bilim salasyn basqarý júiesi ózgeretin bolady. Aýdandyq jáne qalalyq bilim berý bólimderin basqarý qyzmeti oblystyq basqarmalarǵa beriledi. Ol úshin «Biýdjet» kodeksine, «Bilim týraly» jáne «Jergilikti memlekettik basqarý týraly» zańdarǵa 27 ózgeris engizildi. Zańǵa sáikes bilim bólimderiniń mártebesi saqtalady. Biraq, olar bilim basqarmalaryna qarasty bolady jáne oǵan esep beredi. Kóp jaǵdaida bilim sapasy onyń menedjmentine, qarjylandyrylýyna jumyldyrylǵan barlyq protsesterdiń tiimdi ózara is-qimylyna bailanysty. Aýdandyq, qalalyq jáne oblystyq bilim basqarmalary ózara is-qimylynyń búgingi protsesi qoǵam tarapynan ádil synǵa ushyrap otyr», - dedi Bibigúl Asylova vedomstvonyń apparat jinalysynda.
Onyń atap ótýinshe, 2019 jyly Bilim jáne ǵylym ministrligi Memleket basshysynyń tapsyrmasymen ózara is-qimyldyń tiimdiligin arttyrý boiynsha normativtik institýtsionaldy jáne uiymdastyrý sharalaryn qabyldady.
«Kelesi jyldyń basynan bastap qalalyq jáne aýdandyq bilim bólimderin qarjylandyrýdy basqarý oblystyq deńgeige kóshedi. Bul sharalar oblystyq deńgeidegi jergilikti atqarýshy organdardyń jergilikti jerlerdegi bilim berý uiymdarynyń problemaly máselelerine qarym-qatynasyn aitarlyqtai ózgertedi», - dedi ol.
