2021 jyldyń 1 shildesinen Ákimshilik ádilet kodeksi qoldanysqa engiziledi. Bul týraly QR sýdialarynyń VIII sezinde Joǵarǵy sot tóraǵasy Jaqyp Asanov aitty, dep habarlaidy "Ult aqparat".
«Memlekettik organdar jaýapkershilik alǵysy kelmeidi. Sotqa silteidi. Óz aktilerin ózgertýge qorqady. «Sotqa baryp, onyń sheshimin alyp kelińizder» deidi. Ákimshilik ádilet týraly kodekske úlken úmit artyp otyrmyz. Ol 2021 jyldyń 1 shildesinen qoldanysqa engiziledi. Ákimshilik ádilet engizilgen elderde memlekettik organdardyń tártibi men jaýapkershiligi kúrt artqan», - dedi Jaqyp Asanov.
Onyń atap ótýinshe, adaldyqqa shaqyrý keide nátijeli bola bermeidi. Sondyqtan da qatań ádisterdi qolǵa alýǵa týra keledi.
«Qaýipsizdik qyzmetin UQK mamandarymen kúsheittik. Sybailas jemqorlyqqa qarsy is-qimyl agenttigimen jumys jolǵa qoiyldy. Nátijesinde 2018 jyldan beri 28 sýdia qylmystyq qýdalaý sýbektisi boldy. Bul osyǵan deiingi 8 jyldy qosa alǵannan da kóp. Olardyń ishinde 14-i sottaldy, qalǵandary jumystan shyǵaryldy nemese is áli de sotta qaralyp jatyr», - dedi Joǵarǵy sot tóraǵasy.
