Meditsinalyq saqtandyrý qory halyqpen keri bailanys ornatýǵa erekshe nazar aýdarady. Bul týraly Ortalyq kommýnikatsiialar qyzmetinde ótken brifingte Áleýmettik meditsinalyq saqtandyrý qorynyń Basqarma tóraǵasy Bolat Tókejanov aitty, dep habarlaidy QazAqparat.
«Ótken jyl ishinde biz 720 myńǵa jýyq ótinishti qabyldap, qaradyq. 95% astamy - MÁMS júiesine qatysý, meditsinalyq kómek alý, koronavirýs boiynsha konsýltatsiialar. Osy ótinishterdiń ishinde qormen egin meditsinalyq kómektiń kepildik berilgen kólemi sheńberinde jáne MÁMS júiesinde meditsinalyq qyzmetter kórsetýge sharty bar meditsinalyq uiymdardyń atyna kelip túsken 8 myńǵa jýyq shaǵym bar», - deidi Áleýmettik meditsinalyq saqtandyrý qorynyń Basqarma tóraǵasy.
Onyń aitýynsha, halyq kóbinese konsýltatsiialyq-diagnostikalyq qyzmetterdiń qoljetimsizdigine (jabdyqtyń bolmaýy, kútý uzaqtyǵy, joldamanyń berilmeýi, kadr tapshylyǵy), meditsina qyzmetkerleriniń dórekiligi men biliksizdigine, meditsinalyq kómek kórsetý sapasyna, aqyly qyzmetterge jiberýge, aýrýhanaǵa jatqyzýdan bas tartýǵa qatysty shaǵymdanady.
«Densaýlyq saqtaý júiesiniń negizgi qatysýshysy retinde qor 2021 jyly osy máselelerdi birlesip sheshý jumystaryn jalǵastyrady, bul rette basty maqsat – patsientterdiń quqyqtaryn qorǵaý. Densaýlyq saqtaýdaǵy basty tulǵa - naýqas, onyń múddeleri men densaýlyǵy. Bizdiń maqsatymyz – densaýlyq saqtaý júiesindegi meditsinalyq kómektiń sapasyn arttyrýdyń katalizatoryna ainalatyn meditsinalyq qyzmetterdi jetkizýshilerdiń básekege qabilettigin arttyrý. Osy jyldar ishinde jeke jetkizýshiler naryǵynyń dinamikasy 50%-ǵa artty, bul sońǵy 3 jylda qol jetkizilgen úlken nátije. Biz adal básekelestik degen ustanymǵa berik bolamyz, bul sapaly meditsinaǵa aparatyn jalǵyz jol», - deidi ol.
