2020 jyly memleket múddesi shamamen 2,1 mlrd AQSh dollaryna qorǵaldy. Bul týraly QR Ádilet vitse-ministri Almat Madaliev aitty, dep habarlaidy QazAqparat.
«Esep berý kezeńinde, 25 talqylaýlarda memleket múddesin qorǵaý boiynsha jumystar júrgizildi, onyń ishinde 15 – halyqaralyq tórelikterde. Jyl basyna belgilengen birqatar tyńdaý belgisiz merzimge keiinge qaldyryldy. Degenmen, QR mańyzdy birneshe sot tyńdaýlary Ádilet ministrliginiń ótinishi boiynsha qashyqtyqtan onlain formatta ótkizildi. Osyǵan bailanysty 2020 jylǵy naýryz aiynda tarihi oqiǵa boldy – Angliianyń Joǵarǵy sotyndaǵy QR jáne Ulttyq bankiniń Statige qarsy isi, Angliia sot júiesiniń 900 jyldyq tarihyndaǵy onlain formatta júrgizilgen jáne YouTube arqyly tikelei efirde kórsetilgen alǵash sot talqylaýy boldy», - dedi ol ministrliktiń keńeitilgen alqa otyrysynda.
Onyń atap ótýinshe, jalpy alǵanda, 2020 jyly memleket múddesi shamamen 2,1 mlrd AQSh dollaryna qorǵalǵan. Máselen, ótken jyly Tribýnal 2016 jyly kanadalyq Gold Pool kompaniiasynyń talap aryzy boiynsha Qazaqstannyń paidasyna sheshim shyǵardy jáne 917 mln AQSh dollary mólsherinde talap-aryzdy qabyldamady. 2020 jyldyń qarasha aiynda aǵylshyn soty QR apelliatsiialyq talaptaryn qanaǵattandyryp, Ýorld Ýaid Minerals kanadalyq kompaniianyń talaby boiynsha tórelik tribýnaldyń buryn shyǵarǵan sheshimin joidy. Sondai-aq, sot QR-na jarty million AQSh dollaryna ótem berdi. Olar 2021 jyldyń 12 qańtarynda Nur-Sultan qalasynyń Qazynashylyq departamentiniń shotyna kelip tústi. Budan basqa, ótken jyly Ádilet ministrligii Ulttyq qor men Samuryq-Qazynanyń aktivterin zańsyz qamaýǵa alýmen bailanysty Stati isi boiynsha Respýblika úshin mańyzdy sheshimder shyǵarýǵa qol jetkizdi.
«2020 jylǵy 22 sáýirde aǵylshyn soty Qazaqstannyń paidasyna sheshim shyǵaryp, Ulttyq qordyń aktivteri Statidiń talaby boiynsha tyiym salynbaidy dep qaýly etti. Sonymen qatar, sot Statige Ulttyq bankke jáne Qazaqstan Respýblikasyna 3,7 mln AQSh dollarynan astam mólsherindegi sot shyǵyndaryn tóleýge mindettedi. Qazirgi ýaqytta Niderlandyda, Shvetsiiada, Liýksembýrgte, Belgiiada jáne Ulybritaniiada oryndaý protsessteri alynyp tastaldy jáne toqtatyldy», - dedi Almat Madaliev.
