2020 jyly mindetti áleýmettik meditsinalyq saqtandyrýǵa jarna men aýdarym túrinde 550 milliard teńge tústi. Bul týraly Ortalyq kommýnikatsiialar qyzmetinde ótken brifingide Áleýmettik meditsinalyq saqtandyrý qorynyń Basqarma tóraǵasy Bolat Tókejanov aitty, dep habarlaidy QazAqparat.
«Túsimderdiń eń kóp mólsheri azamattardyń jeńildigi bar sanattary úshin aýdarylǵan memleket jarnasy esebinen júzege asyryldy. Onyń kólemi – 297,6 mlrd teńge, bul barlyq aýdarymnyń 54%-y. Osylaisha, memleket halyq aldyndaǵy áleýmettik mindettemelerin saqtap keledi. Jumys berýshilerdiń jumysshylary úshin aýdarymy 162,6 mlrd teńge (30%). Al jeke tulǵalardyń aýdarym kólemi 16%», - deidi Áleýmettik meditsinalyq saqtandyrý qorynyń Basqarma tóraǵasy Bolat Tókejanov.
Onyń aitýynsha, 2020 jyly mindetti áleýmettik meditsinalyq saqtandyrýǵa jarna men aýdarym túrinde túsken qarjy mólsheri 550,4 milliard teńge.
«Mindetti áleýmettik meditsinalyq saqtandyrýdan túsetin barlyq qarajat turǵyndarǵa meditsinalyq kómek aqysyn tóleýge baǵyttalǵan. Ótken jyly qordyń meditsinalyq qyzmetterin satyp alý jospary 1 807 mlrd teńge boldy, bul 2019 jylmen salystyrǵanda bir jarym esege ósti. Meditsinalyq kómektiń kepildendirilgen kólemin qarjylandyrý – 1,2 trln teńge, mindetti áleýmettik meditsinalyq saqtandyrý – 569 mlrd teńgege jetti. Qarjylandyrýdyń edáýir ulǵaiýy halyqqa meditsinalyq kómek kólemin ulǵaitýǵa múmkindik berdi. Burynǵydai ambýlatoriialyq-emhanalyq kómekti qarjylandyrýǵa basymdyq bere beremiz», - deidi ol.
