2020 jyly elorda bir trillion teńgeden asa rekordtyq investitsiia tartty. Bul týraly qala turǵyndarymen esep berý kezdesýinde elorda ákimi Altai Kólginov aitty, dep habarlaidy "Ult aqparat".
«2020 jyly koronavirýs pandemiiasyna qaramastan, elorda ákimdigi azamattar men qala úshin mańyzdy jobalar úshin jeke investitsiialardy tartý boiynsha jumystardy toqtatqan joq. Byltyr elordaǵa 1,1 trillion teńge tartyldy. Bul 2019 jylǵa qaraǵanda 21,5 paiyzǵa artyq», - dedi ol.
Qala basshysy 2020 jyl ońai bolmaǵanyn jasyrmady.
«Biraq pandemiianyń ýaqytsha ekenin túsiný kerek. Qalada turǵyn úi men áleýmettik nysandardy, infraqurylym jáne taǵy basqalaryn salýdy mindetti túrde jalǵastyrý qajet. Karantin kezinde qurylys jumystary toqtatylǵan joq. Jumystar sanitarlyq normany qatań saqtaý arqyly júrgizildi. 2020 jyly elordada 3 mln sharshy metr turǵyn úi salynyp, paidalanýǵa berildi. Bul 2019 jylǵa qaraǵanda eki esege kóp»»,- dedi Altai Kólginov.
Onyń atap ótýinshe, ótken jyly ModeX úi kombinatynyń jumysy iske qosyldy. Úi kombinattary turǵyn úi qurylysyna kómektesedi jáne qurylystyń ýaqytyn qysqartýǵa, turǵyn úi qunyn tómendetýge, úi sapasyn arttyrýǵa múmkindik beredi.
