QR Premer-Ministri Asqar Maminniń tóraǵalyǵymen ótken Úkimet otyrysynda indýstriia jáne infraqurylymdyq damý ministri Beibit Atamqulov Memleket basshysynyń 2020 jylǵy 10 shildedegi keńeitilgen otyrysta bergen tapsyrmalarynyń oryndalýy týraly baiandady, dep habarlaidy primeminister.kz saity.
B. Atamqulovtyń málimetinshe, 2020 jylǵy I jartyjyldyq qorytyndysy boiynsha óńdeý ónerkásibindegi óndiris kólemi 4,8%-ǵa ósken.
«Jyl sońyna deiin óńdeý ónerkásibi salalary boiynsha barlyq josparly kórsetkishke qol jetkizýdi josparlap otyrmyz. Óńdeý ónerkásibi salalarynda biz 1,7 trln teńge somasyna 65-ten asa joba iske asyrýdy josparlap otyrmyz. Bul 2025 jylǵa qarai saladaǵy importty 20%-ǵa qysqartýǵa múmkindik beredi», — dedi ministr.
«Nurly jol», «Nurly jer» jáne «Jumyspen qamtý jol kartasy» baǵdarlamalary boiynsha jalpy quny 3,7 mlrd teńgeni quraityn 6 202 infraqurylymdyq joba iske asyrylýda, ondaǵy qazaqstandyq qamtý úlesi - 90%.
Sonymen qatarqurylys materialdaryn shyǵarý boiynsha 33 joba iske asyrylýda, osynyń esebinen import úlesin 15%-ǵa azaitý jáne turǵyn úi qurylysynda 90%-ǵa deiin otandyq qurylys materaldaryn paidalaný josparlanýda.
Ministrlik qurylys salasynda qazaqstandyq qamtý úlesin ulǵaitý boiynsha naqty sharalar qabyldaýda:
Birinshi. Biýdjettik qarajat esebinen qarjylandyrylatyn jobalarda otandyq materialdardy mindetti túrde qoldaný boiynsha quqyqtyq baza quryldy.
Ekinshi. Saraptamadan ótken barlyq jobanyń jiyntyq resýrstyq vedomostary engizilgen Portal ázirlendi.
Úshinshi. Memlekettik satyp alýdy iske asyrý erejesinde otandyq taýar óndirýshiler tizilimine sáikes materialdardy satyp alýǵa mindetteitin qurylys salasyndaǵy úlgi sharttaryna tolyqtyrýlar engizildi.
Tórtinshi. Otandyq taýar óndirýshilerdiń talaptaryn oryndamaǵany úshin jaýapkershilikti kúsheitý boiynsha quqyqtyq sharalardy pysyqtalýda.
Óńdeýshi ónerkásipti damytýdyń jáne investitsiialardy tartýdyń taǵy bir quraly arnaiy ekonomikalyq aimaq sanalady.
Elimizde 13 arnaiy ekonomikalyq aimaq jumys isteidi. Infraqurylym 6 arnaiy ekonomikalyq aimaǵynda ǵana tolyq aiaqtaldy. Arnaiy ekonomikalyq aimaq aýmaǵyn igerý 44%-dy quraidy. Arnaiy ekonomikalyq aimaqta 169 joba iske qosyldy. 23,6 myńnan astam turaqty jumys orny ashyldy. Biýdjetke salyq túrinde 180 mlrd teńge qaitaryldy.
«Memleket basshysynyń tapsyrmasyna sáikes arnaiy ekonomikalyq aimaq tiimdiligin arttyrý úshin biz qazirgi ýaqytta zańnamany jetildirý boiynsha jumys júrgizýdemiz, damý strategiiasyn qaita qarastyryp, arnaiy ekonomikalyq aimaq shekaralaryn keńeitip, jańa qyzmet túrlerin qosyp jatyrmyz», — dedi B. Atamqulov.
Búgingi tańda jalpy somasy 4,2 trln teńgege 156 joba iske asyrylýda, qosymsha 8,2 myń turaqty jumys ornyn qurý kózdelgen.
«Memleket basshysynyń barlyq tapsyrmasy Ministrliktiń erekshe baqylaýynda jáne ýaqtyly oryndalady», — dep túiindedi B. Atamqulov.
