Ortalyq kommýnikatsiialar qyzmeti alańynda elimizdiń birqatar ministrlikteri men vedomstvolarynyń ókilderi 2015-2016 jyldardaǵy «Nurly jol» memlekettik baǵdarlamasyn júzege asyrýdyń qorytyndylaryn jariialady, dep habarlaidy Ult.kz tilshisi QazAqparat agenttigine silteme jasap.
QR Ulttyq ekonomika ministrligi Salalyq ekonomika departamentiniń direktory Erjan Qazanbaev jol qurylysy jáne jóndeý jumystaryn júzege asyrý barysy jóninde aityp berdi.
Ministrdiń málimdeýinshe, negizgi avtokólik jobalaryn júzege asyrý úshin «shuǵyla» qaǵidaty boiynsha 2 jyl ishinde 616 mlrd teńge bólindi. Atalǵan qarajattyń esebinen respýblika boiynsha 2 myń shaqyrym jol qurylysy jáne jóndeý jumystarymen qamtylǵan, onyń ishinde 1,3 myń shaqyrymnan astam avtokólik joly iske qosylǵan.
«Atalǵan baǵytqa biyl biýdjetten 356 mlrd teńge qarastyrylyp otyr. 4,4 myń shaqyrym avtokólik jolyna qurylys, jóndeý jumystaryn júrgizý jáne 600 shaqyrym joldy paidalanýǵa berý josparlanyp otyr», - dedi Qazanbaev.
Sondai-aq, QR Ulttyq ekonomika ministrligi departamentiniń basshysy Úsharal-Dostyq avtojolyna júrgiziletin kúrdeli jóndeý jumystary jónindegi jýrnalister qoiǵan saýaldarǵa jaýap berdi.
«Úsharal-Dostyq avtojolynyń kúrdeli jóndeý jumystaryna biylǵy biýdjette qarjy qarastyrylǵan. Merdigeri de anyqtaldy. Endi tamyz-qyrkúiek aiynda jóndeý jumystary bastalady», - dedi E.Qazanbaev.
Óz kezeginde, QR Investitsiialar jáne damý ministrligi Avtomobil joldary komiteti tóraǵasynyń orynbasary Amangeldi Bekov qazaqstandyq joldarǵa aqyly tólem júiesin engizý barysy jóninde baiandady.
«Nurly jol» baǵdarlamasynda 7 myń shaqyrym jolǵa tólem júiesin engizý qarastyrylǵan. Ázirge mundai júie 220 shaqyrymǵa sozylatyn Astana-Shýche jolynda ǵana bar. 2013 jyldan búginge deiin bul joldan shamamen 4 mlrd teńge jinalǵan jáne bul qarajat tolyǵymen atalǵan joldyń kútimine jumsalady», - dedi ol.
Bekovtyń aitýynsha, biyl 450 shaqyrymǵa sozylatyn Astana-Temirtaý, Almaty-Qapshaǵai jáne Almaty-Qorǵas aýmaqtaryna tólem jinaý júiesin ornatý jumystary bastalady.
«Jyl sońyna qarai atalǵan júieler avtonomdy rejimde jumys isteidi jáne kelesi jyldan bastap, bul joldar aqyly bolady. Sondai-aq, biyl 5 myń shaqyrym joldyń jobalyq-smetalyq qujattamasyn ázirleimiz, tólem jinaý júielerin ornatý jumystary 2018-2019 jyldary atqarylady. Jalpy alǵanda, 2020 jylǵa qarai, 7 myń shaqyrym jol aqyly túrge aýysady jáne jyl saiyn shamamen 30 mlrd teńge jinalýy múmkin», - dedi Bekov.
.jpeg)