2020 jylǵy qańtar-qarasha ailarynda et óndirý kólemi (qus etin qospaǵanda) 435 myń tonnadan asty. Bul 2019 jyldyń sáikes kezeńimen salystyrǵanda 3,2%-ǵa artyq.
Bul málimetter QR Aýyl sharýashylyǵy ministrliginiń resmi saitynda jariialandy, dep habarlaidy "Ult aqparat".
Sondai-aq, shujyq ónimderin óndirý 12%-ǵa (48-den 53,8 myń tonnaǵa deiin) jáne et konservilerin óndirý 13,8%-ǵa (7,7-den 8,8 myń tonnaǵa deiin) artty.
Siyr etiniń eksporty ótken jyldyń qańtar-qazan aralyǵynda 26,4 mln AQSh dollaryn qurady.
Otandyq daiyn ónim óndirisiniń ósýi mal sharýashylyǵy jáne et óńdeý salalaryndaǵy memlekettik kómektiń ulǵaiýyna bailanysty. Sonymen qatar, óńdeýshi kásiporyndarynyń qýatynyń artýyna QR AShM ótken jyly iske qosqan tiri mal eksportyna moratorii jariialaýy oń áserin tigizdi. Bul shara janýarlardyń elimizdiń shekarasynan jappai shyǵarylýyn toqtatyp qana qoimai, Prezidenttiń tapsyrmasyna sáikes daiyn ónim óndirisiniń kólemin ulǵaitýǵa múmkindik berdi.
Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasy aiasynda et óńdeýshiler úshin kelesi memlekettik qoldaý túrleri:
1) jumys istep turǵan zaýyttardy jańǵyrtýǵa jáne jańa zaýyttardy salýǵa investitsiialyq salymdardyń bir bóligin óteý (25%-ǵa deiin);
2) ainalym jáne negizgi quraldarǵa arnalǵan nesieler boiynsha syiaqynyń paiyzdyq mólsherlemesin sýbsidiialaý;
3) «Qarapaiym zattar ekonomikasy» baǵdarlamasy sheńberinde, onyń ishinde et jáne qus etin óndirýshilerge jeńildikpen nesie berý qarastyrylǵan.
Sonymen qatar, QR AShM ógizshelerdi et óńdeý kásiporyndaryna tapsyrý kezinde fermerlerdi sýbsidiialaý sharalaryn engizdi. Mal ósirýshiler memleketten qosymsha bir kilogramm tiri salmaq úshin 200 teńgeden ala alady.
