Prezidenttikke kandidattardyń basym bóliginiń sailaýǵa alǵash ret qatysýy saiasi taptyń jańarý trendine dálel bolady. Bul týraly QR Prezidentiniń keńesshisi Erlan Qarin Telegram-daǵy paraqshasynda jazdy, dep habarlaidy QazAqparat tilshisi.
«Sonymen, búgin sońǵy kandidat tirkeldi. Tirkeý kezeńi resmi áli de aiaqtalmaǵanyna qaramastan usynylǵandardyń barlyǵy da qol qoiý paraqtaryn jinap, tirkelip úlgerdi. Al bul Prezidenttik laýazymǵa úmitkerlerdiń short-paraqshasy merziminen buryn anyqtaldy degendi bildiredi», - dep jazdy ol.
Sonymen qatar Erlan Qarin 2019 jylǵy sailaýdyń ereksheligi bul ǵana emestigine nazar aýdartady.
«Kandidattardyń eń kóp sany tirkeldi - 7. Bir úmitker emtihan tapsyra almady, taǵy biri ózdiginen bas tartty. Osylaisha, tirkeý kezeńinen kandidattyq ótinimderdiń 80 paiyzǵa jýyǵy ótti. Is júzinde barlyq kandidattar (bireýinen basqasy) prezidenttik sailaýǵa alǵash ret qatysyp otyr. Bul saiasi taptyń jańarý trendine dálel bola alady. Sailaý naýqanynyń belsendi kezeńinde saiasi kúshterdiń barlyq negizgi palitrasy - solshyl, ońshyldar, ortalyqshyl, sonymen qatar alǵash ret ulttyq-patriottyq blok kandidaty sailaýǵa qatysady», - dedi saiasattanýshy.
Onyń paiymynsha, osylaisha ashyq ári básekege toly sailaý ótetindigi naqtylanyp otyr. Kandidattar sanynyń kóp bolýy sailaý protsesiniń belsendi kezeńine elimizdegi negizgi saiasi kúshterdiń, onyń ishinde oppozitsiianyń da qatysatynyn bildiredi.
«Kandidattardyń basym bóligi sailaý naýqanyna alǵash ret qatysyp otyr, jańa tulǵalar paida boldy. Soǵan orai sailaýshylarda sailaý úshin ártúri balama bolady», - dedi E.Qarin.
