2018 jyly Biryńǵai jinaqtaýshy zeinetaqy qorynan tólenetin zeinetaqynyń boljamdy ortasha kólemi jariia etildi, dep habarlaidy QazAqparat.
Zańnamaǵa sáikes, BJZQ-dan tólenetin ai saiynǵy zeinetaqy tóleminiń kólemi 2012 jyly Úkimettiń qaýlysymen bekitilgen ádistemege sáikes eseptelinetin zeinetaqy tóleminiń 1/12 jyldyq somasy retinde anyqtalady.
«Aǵymdaǵy jyly BJZQ-nyń salymshylaryna ai saiyn tólenetin eń tómengi soma 15 274 teńgeni quraidy. Bul tsifr zańmen bekitilgen normaǵa sáikes alynyp otyr. Iaǵni, tólem kólemi eń tómengi kúnkóristen 54 paiyzǵa tómen bolmaýy tiis. Mundai aqshany BZJQ-dan tólem alýǵa quqyly qazaqstandyqtardyń negizgi bóligi alady. Olar zeinetkerlikke shyqan kezdegi jinaqtary 900 myńnan 2 mln teńgege deiingi somany quraityn adamdar. Olardyń sany 62 myń adam. 2 mln teńgeden astam jinaǵy bar 7 myńnan astam adam BJZQ-dan ai saiyn 15274 teńge alyp otyrady», - dedi «BJZQ» AQ-nyń basqarýshy direktory Janar Tólegenova.
Sonymen qatar onyń aitýynsha, 2017 jyly zeinetaqy annýiteti aiasynda saqtandyrý kompaniialaryna 2784 adam úshin 26,7 mlrd teńge aýdaryldy.
«15274 teńge somasy - bul qazaqstandyqtar alatyn zeinetaqynyń 1/3 bóligi ǵana. 2/3 zeinetaqyny memleket tóleitin bazalyq jáne yntymaqty zeinetaqy quraidy. 2040 jylǵa qarai zeinetkerlikke shyǵatyndar yntymaqty zeinetaqy almaidy. Óitkeni, ol 1998 jylǵa deiingi eńbek ótilimen bailanysty. Tek bazalyq zeinetaqy men BJZQ tólemderi ǵana qalady. Sondyqtan jas qazaqstandyqtar qazirden bastap erteńgi kúnin oilap, zeinetaqy tólemderin aýdaryp otyrǵandary durys», - dedi «BJZQ» AQ basqarmasy tóraǵasynyń orynbasary Sáýle Egeýbaeva.
Aita keteiik, 2018 jyldyń 1 qańtarynan bastap, BJZQ-dan mindetti zeinetaqy jarnalary, mindetti kásiptik zeinetaqy jarnalary esebinen zeinetaqy tólemderi tek ai saiyn ǵana júzege asyrylatyn bolady. Eger Qorǵa júgingen kúni zeinetaqy jinaqtarynyń somasy eń tómen zeinetaqynyń 12 eselengen mólsherinen aspaǵan bolsa, olardy tolyǵymen alýǵa múmkindik bar. 2018 jyly bul soma: 33 745 x12 =404 940 teńgeni quraidy. Bul somadan artyq qarajattyń barlyǵy tek ai saiyn tólenedi. BJZQ-dan tólenetin ai saiynǵy zeinetaqy tólemderiniń mólsheri Úkimet Qaýlysymen bekitilgen, Zeinetaqy tólemderiniń mólsherin esepteýdi júzege asyrý ádistemesine sáikes, zeinetaqy tólemderiniń jyldyq somasynyń on ekiden bir bóligi retinde aiqyndalady.
