Búgin QR Úkimetiniń baspasóz ortalyǵy alańynda ótken baspasóz máslihatynda QR Indýstriia jáne infraqurylymdyq damý vitse-ministri Qaiyrbek Óskenbaev turǵyn úidiń qoljetimdiligi men sapasyn arttyrý boiynsha qabyldanyp jatqan sharalar týraly aitty, dep habarlaidy "Ult aqparat".
Q. Óskenbaev atap ótkendei, 2018 jyl turǵyn úi qurylysy boiynsha tabysty boldy.
«2018 jyldyń qorytyndysy boiynsha 12,5 mln m² turǵyn úi iske qosyldy, ol ótken jyldyń deńgeiinen 12,1% joǵary. 113 myńnan astam otbasy turǵyn úi jaǵdailaryn jaqsartty», — dep atap ótti vitse-ministr.
2018 jyly turǵyn úi qurylysyna 1,2 trln teńge investitsiialandy. Bul 2017 jyldan 8,1%-ǵa artyq. Investitsiialardyń negizgi úlesin — 86% — jeke qurylys salýshylar men halyqtyń investitsiialary quraidy. 1 teńgege memlekettik qarajatqa 6 teńge jeke investitsiialar tartyldy.
2018 jyly paidalanýǵa berilgen turǵyn úi kólemi 2017 jylmen salystyrǵanda 12,1%-ǵa artty. Jeke turǵyn úi qurylysyna investitsiia 459 mlrd teńgeni, kóppáterli turǵyn úi qurylysyna — 702 mlrd teńgeni qurady. Jeke investitsiialar esebinen 5,7 mln m² nemese 39 myńnan astam jeke turǵyn úi, sondai-aq 6,8 mln m² nemese 74 myńnan astam kóp páterli turǵyn úi paidalanýǵa berildi. Turǵyn úidi paidalanýǵa berýdiń artý deńgeii respýblikanyń barlyq óńirlerinde baiqalady.
2018 jyly «Nurly jer» memlekettik baǵdarlamasyn júzege asyrý qorytyndylary týraly aita kele, vitse-ministr baǵdarlamanyń turǵyn úi qurylysyna qaita investitsiia salý jáne qaitarý tetikterin qarastyratynyn eske saldy. Bul baǵdarlamany iske asyrýǵa salynǵan aqsha qaitarymdy negizde eldiń turǵyn úi qurylysyna turaqty túrde investitsiialanatynyn bildiredi.
«7-20-25» baǵdarlamasynyń qabyldanýyna bailanysty Memleket basshysynyń tapsyrmasy boiynsha 2019 jyldan bastap qurylys alańdaryn injenerlik kommýnikatsiialarmen jabdyqtaýdy qarjylandyrý somasy 80 mlrd teńgeden 100 mlrd teńgege deiin artty.
«Nurly jer» baǵdarlamasy aiasynda jalǵa beriletin jáne kredittik turǵyn úilerdi qarjylandyrý qarastyrylǵan.
Q. Óskenbaevtyń aitýynsha, «Satyp alýsyz jalǵa beriletin turǵyn úi qurylysy» baǵyty boiynsha jyl saiyn 25 mlrd teńgege deiin bólingen. 2019 jyldan bastap qarjylandyrý 35 mlrd teńgege deiin artty.
Ákimdikter «Kredittik turǵyn úi qurylysy» baǵyty boiynsha jobalardy qarjylandyrady (revolverlik negizde). Jyl saiyn turǵyn úi qurylysyna 200 mlrd teńge bólinedi. Onyń aitýynsha, atalǵan baǵyt aiasynda turǵyn úi qurylysy budan bylai tek qana óse beredi.
«Nurly jer» baǵdarlamasynyń taǵy bir baǵyty aiasynda — «Jeke qurylys salýshylardyń turǵyn úi salýyn yntalandyrý» — «Damý» banki arqyly qurylys kompaniialarynyń turǵyn úi qurylysyna nesielerin sýbsidiialaý qarastyrylǵan. Syiaqy stavkasynyń 7% sýbsidiialanady. Al bankter bolsa 152 mlrd teńgege deiin qaryz berdi.
«“7-20-25” ipotekalyq baǵdarlamasy men “Nurly jer” baǵdarlamasy bir-birin tamasha tolyqtyrýda. Eger “7-20-25” baǵdarlamasy turǵyn úidi satyp alý úshin adamdarǵa qarajatqa qol jetimdilik berse, “Nurly jer” turǵyndarymyzdy qoljetimdi baǵamen páterlermen qamtamasyz etýge baǵyttalǵan», — dedi Q. Óskenbaev.
Onyń aitýynsha, «7-20-25» baǵdarlamasyn tiimdi júzege asyrý úshin «Nurly jer» baǵdarlamasyna túzetýler engizildi. «Nurly jer» baǵdarlamasy boiynsha ákimdikter salǵan turǵyn úilerdi «7-20-25» baǵdarlamasyna qatysýshylar men turǵyn úi qurylys jinaq bankiniń salymshylaryna bir mezgilde iske asyrý júiesi qarastyrylǵan.
«Eger 2017 jyly Qazaqstanda 11 mln m² turǵyn úi salynsa, 2018 jyly – 12 mln m² turǵyn úi salydy, al 2019 jyly biz 13 mln m² turǵyn úi salýdy josparlap otyrmyz. Bul úshin barlyq alǵysharttar bar. Olar jaqsy saraptamaǵa negizdelgen. Meniń oiymsha, biz alǵa qoiylǵan mindetti oryndap shyǵamyz», — dedi Q. Óskenbaev.
.jpeg)