QR densaýlyq saqtaý jáne áleýmettik damý ministri Tamara Dúisenova Premer-Ministr Baqytjan Saǵyntaevtyń tóraǵalyǵymen ótip jatqan Úkimet otyrysy kezinde «Jumyspen qamtýdyń jol kartasy-2020» baǵdarlamasy aiasynda aýyldardaǵy jumyspen qamtý barysy týraly esep berdi. Bul týraly QR Premer-Ministriniń resmi saity habarlady.
Ministrdiń málimetine sáikes, 2011 jyldan beri 41,6 myń adam shaǵyn nesie alsa, onyń ishinde 27,2 myń adam kásipker atanǵan. Shaǵyn nesie alǵandar 38,5 myń qosymsha jumys oryndaryn ashty.
T. Dúisenova biyl shaǵyn nesielendirý úsh sulba boiynsha júrgizilip jatqanyn habarlady:
- baǵdarlama qatysýshysy óz kapitalymen nemese bar taýarymen aimaqtarda qurylǵan aýyl sharýashylyǵy kooperativterine kiredi;
- «Aýylda jumyspen qamtý» jobasyn júzege asyrý boiynsha «Nur Otan» partiiasymen birikken joba. Joba bes oblysta pilottyq rejimde júzege asyrylyp jatyr. Jobanyń maqsaty - jeke qosalqy sharýashylyq bazasynda usaq taýarly óndiristi qurý. Sondai-aq, shaǵyn nesie somasy 6 mln teńgege deiin arttyrylǵan.
- kásipkerlik kartasyna sáikes, shaǵyn nesie 3 mln teńgege deiingi kólemde beriledi.
«Osy maqsattarǵa biyl 30,8 mlrd teńge qarastyrylǵan. Osy qarajat esebinen biyl 9,1 myń adam shaǵyn nesie alyp, aýyldyq jerlerde shamamen 12 myń jumys ornyn ashady», - dep aqparattandyrdy ministrlik basshysy.
QR DSÁDM málimetterine sáikes, búginde 6,4 myńnan astam adamǵa shaǵyn nesie berilgen, onyń ishinde shamamen 4 myń adam alǵash ret óz isin ashqan. Nesie alǵandardyń barlyǵynyń ishinen 5 myńnan astamy ózin-ózi jumyspen qamtyǵandar, qalǵandary – jumyssyzdar.
«Shaǵyn nesie alǵan azamattardyń ishinen 89%-y nesieni aýyl sharýashylyǵy salasyna, 6% - qyzmet kórsetý salasyna, 3% - ónimdi qaita óńdeýge, 2 % - basqa da salalarǵa paidalanǵan», - dedi T. Dúisenova.
