20 kún úiine qonbaǵan atyraýlyq jasóspirim Aqtaýdaǵy mektep-internatqa jiberildi, dep habarlaidy QazAqparat.
Oblystyq politsiia departamenti baspasóz qyzmetiniń aqparatyna qaraǵanda, jyl basynan beri iývenaldy politsiia bólimshesiniń qyzmetkerleri kámeletke tolmaǵan balalaryn tárbieleý jáne oǵan bilim berý, onyń quqyqtary men múddelerin qorǵaý jónindegi mindetterdi oryndamaǵan 96 ata-anany anyqtady.
Olardyń bári QR Ákimshilik quqyq buzý kodeksiniń 127-babymen ákimshilik jaýapkershilikke tartyldy.
Atyraý qalalyq politsiia basqarmasy iývenaldy politsiia bólimshesiniń qyzmetkerleri jyl basynan beri kámeletke tolmaǵandar arasyndaǵy quqyq buzýshylyqtardyń profilaktikasy men balalardyń qadaǵalaýsyz jáne panasyz qalýynyń aldyn alý maqsatynda 54 is-qujat jinaqtady.
Máselen, 1981 jylǵy áiel 15 jasar ulynyń 20 kúnge jýyq turǵylyqty mekenjaiyndaǵy úiine qonbai, qańǵybastyqqa salynǵanyna shaǵymdandy.
Atalǵan azamatshanyń shaǵymynyń negizinde tártip saqshylary jasóspirimniń sabaqqa 10 kúnnen asa qatyspaǵanyn anyqtady.
Politsiia qyzmetkerleri men synyp jetekshisi, mektep psihology jasóspirimge túsindirý jumysyn júrgizse de, onyń úige qonbaý deregi birneshe ret qaitalandy.
«Iývenaldy politsiia bólimshesiniń qyzmetkerleri jasóspirimdi kámeletke tolmaǵandardy beiimdeý ortalyǵyna ornalastyryp, oǵan qatysty jinaqtalǵan is-qujattar Aqtaý qalasyndaǵy devianttyq minez-qulyqty balalarǵa arnalǵan mektep-internatyna ornalastyrý týraly usynyspen Atyraý qalalyq ákimdigi janyndaǵy kámeletke tolmaǵandardyń quqyǵyn qorǵaý komissiiasyna joldandy. Komissiia otyrysynda politseilerdiń usynysy qanaǵattandyrylyp, 15 jasar jasóspirimdi Aqtaý qalasyndaǵy devianttyq minez-qulyqty balalarǵa arnalǵan mektep-internatyna ornalastyrý úshin qaýly shyǵardy»,-dep habarlady departamenttiń baspasóz qyzmeti.
