Almaty tártip saqshylary zańsyz saýda núktelerin anyqtaý úshin qaladaǵy iri avtobazarlaryna reidke shyqty, dep habarlaidy QazAqparat tilshisi.
Búgin tańerteń «Jibek Joly» avtobazaryna tártip saqshylary reid jasady. Bazardy politseiler men Ulttyq gvardiianyń áskeri qyzmetshileri qorshaýǵa alyp, onyń aýmaǵyna eshqandai kólikti kirgizbedi. Áskeriler bazar aýmaǵynan shyqqysy kelgen ár kólikti egjei-tegjeili tekserip shyqty. Sondai-aq, mundai reid qaladaǵy eki bazarda birýaqytta júrgizildi. Reidke 2 myń adam jumyldyryldy.
«25 shildede qaladaǵy qylmystyq jaǵdailardyń qalpyna keltirý úshin Almatyda jedel profilaktikalyq sharalar ótti. Bazardaǵy saýdager de satyp alýshy da tekserýden ótkizildi. Basqa memleketten kelgenderdiń jeke basyna qatysty tekserý jumystaryn júrgizdik. Kóshi-qon týraly zańnamany buzǵan tulǵalarǵa qatysty ákimshilik jaza qoldanylady. Olardyń basqa qylmystarǵa qatystylyǵy tekserilip jatyr. Jalpy jumys 29 shildege deiin jalǵasatyn boldy», - dedi qalalyq IID resmi ókili Saltanat Ázirbek.
