Jambyl oblysynyń Merki aýdanynda 19 jasynda qaitys bolǵan Madinaǵa qatysty jańa málimetter jariialandy. Bul týraly jýrnalist Rýslan Ótepbai áleýmettik jelidegi paraqshasynda málimdedi. Marqumnyń anasy bergen suhbattan úzindi de kópshilik nazaryna usynyldy, dep habarlaidy ult.kz.
Marqumnyń anasynyń aitýynsha, Madinany osydan eki jyl buryn Merkide turatyn jigit alyp qashqan. Ol kezde boijetken nebári 17 jasta bolǵan.
Anasynyń sózinshe, Madina bolashaq jaryna áleýmettik jeli arqyly tanysqan. Ekeýi uzaq ýaqyt aralaspai, shamamen 20 kún sóileskennen keiin úilenýge sheshim qabyldaǵan.
Osylaisha, nebári 17 jasynda turmys qurǵan Madinanyń keiingi taǵdyry qaiǵyly aiaqtaldy. Qazirgi tańda onyń ólimine qatysty tergeý amaldary júrgizilip jatqany habarlandy. Marqumnyń artynda segiz ailyq sábii qalǵany da aitylǵan.
Sonymen qatar, qaiǵyly jaǵdaidyń aldynda Madinanyń qurbysyna kúieýimen janjaldasyp júrgenin jáne ajyrasqysy keletinin aitqany týraly málimet taraǵan.
Rýslan Ótepbai marqumnyń anasy aitqan bul derekter qamtylǵan suhbattyń tolyq nusqasy búgin saǵat 12:00-de YouTube arnasynda jariialanatynyn jetkizdi.
Suhbatta Madinanyń otbasylyq ómiri, turmys qurǵannan keiingi jaǵdaiy jáne qaiǵyly oqiǵaǵa deiingi kezeńi týraly buǵan deiin kópshilikke belgisiz bolǵan málimetter aitylmaq.
