Almaty ákimdigi turǵyndardy 19 naýryzda Birge – taza Qazaqstan respýblikalyq aktsiiasy aiasynda jalpy qalalyq senbilikke qatysýǵa shaqyrdy, dep habarlaidy QazAqparat.
Senbilik ýaqyty: saǵat 9-dan 12-ge deiin bolady. Sonymen qatar, senbilikke 2 000-nan astam kommýnaldyq qyzmet jumysshy men 400-den astam arnaiy tehnika shyǵady dep kútilýde.
«Qysqy kezeńnen keiin qala aýmaǵyn, rekreatsiialyq aimaqtardy, saiabaqtardy, skverlerdi, aýlalardy, sondai-aq, saýda obektilerine, qoǵamdyq tamaqtaný oryndaryna jáne basqa da uiymdarǵa irgeles aýmaqtardy tazartý ári jinaý josparlanýda. Jappai aǵash otyrǵyzý da josparlanǵan.
Barlyq menshik nysanyndaǵy uiymdardyń basshylaryn, onyń ishinde PIK, JKB basshylaryn qajet bolǵan jaǵdaida senbilikke qatysýshylardy irgeles aýmaqtar men aýlalarda qoqys jinaýǵa arnalǵan quraldarmen, qolǵaptarmen, qaptarmen qamtamasyz etýdi suraimyz.
Qoqys salynǵan qaptardy jol jiegine qoiý usynylady. Olardy qalanyń kommýnaldyq qyzmetteri alyp ketedi»,- delinedi ákimdik habarlamasynda.
Senbilik qala aýdandary boiynsha myna oryndarda ótedi:
1) Alataý aýdanynda «Sosnovyi bor» ekoparkinde jappai aǵash otyrǵyzý jáne irgeles jasyl aimaqtar aýmaǵyn jinaý josparlanǵan.
2) Almaly aýdanynda senbilikti Sairan kóliniń shyǵys jaǵalaýynda jappai ótkizý josparlanǵan.
3) Áýezov aýdanynda – Sairan kóliniń batys jaǵalaýynda.
4) Bostandyq aýdanynda – Abai dańǵylynyń bólý jolaǵynda.
5) Jetisý aýdanynda – Gúlder saiabaǵynda.
6) Medeý aýdanynda – Rechka Kazachka kóshesi «Vostochka» TK artynda.
7) Naýryzbai aýdanynda – №7 QKA-nyń irgeles aýmaǵynda jáne Abai dańǵylynyń boiymen Alataý dańǵylynyń shyǵysyna qarai.
8) Túrksib aýdanynda – Petrozavodskaia jáne Mailin kóshelerindegi jyralarda.
