Otandyq arnalardyń birinde aqyn Hanbibi Esenqaraqyzy «Jibek» atty týyndysynyń qalai týǵany týraly áńgimelep berdi, – dep habarlaidy «Ult aqparat».
Baiqaǵanymyzdai, qarapaiym oqyrmannyń ainadai kóńiline sýrettei bolyp qona qalatyn hikaiatty aqyn Hanbibi Esenqaraqyzy jazypty.
Aqyn jazǵan kitaptyń aty – «Jibek». Ómir boiy óleń jazǵan Hanbibi Esenqaraqyzy sońǵy kezderi birtalai prozalar jazdy. Al prozaǵa qalai kelgeni týraly ózi bylai dep aǵynan jaryldy:
«Prozaǵa aýysqanyma birtalai ýaqyt boldy. Alǵashqy «Shyndyqqa qarai júzdim men» degen kitabymdy Fariza apaiǵa kórsetkenimde jatyp ashýlandy. Týlady. «jaqsy aqynsyń, myqty aqynsyń, prozada neń bar? Poeziiada qýaty taýsylǵan adam prozaǵa ketedi» dep ashýlanǵan», – deidi «Alash» Halyqaralyq syilyǵynyń iegeri Hanbibi Esenqaraqyzy.
Al atalǵan týyndysy týraly da jasyrmai syryn aitty. Aqynnyń aitýynsha, kitapty jazý ońai bolmaǵan. Oiynda 18 jyl boiy pisirip, aqyry bul taqyrypqa bir demde otyrǵan eken.
«Jibek» kitabyna barýymnyń ózi meniń 18 jylymdy jedi. 18 jyl boiy oiymda qorytyldy, biraq 18 kúnde jazyldy. Sol kezde alǵashqy ekpinmen, alǵashqy qarqynmen emotsiialyq sezimge berilip, alǵashqy kirispesin shamaly sozyp jibergenimdi ózim de baiqap qaldym. Bas keiipker - Jibek ózimniń naǵashy ájem. Baian degen keiipker – ózim. Bul áýlettiń hikaiasy. Bul hikaiany maǵan meniń anam áńgimelep bergen. Kitapta onyń da obrazy bar. Ózim tórtinshi synypty oqyǵannan bastap Jibek ájeme qarai tarta beretinmin. Tylsym kúsh tartatyn. Sonyń árbir isine, árbir qimylyna bala bolsam da zer salyp, keiin eseigen soń sol ájem týraly jazsam degen oidyń qushaǵynda júrdim», – deidi «Alash» Halyqaralyq syilyǵynyń iegeri Hanbibi Eseqaraqyzy.
Qalamger kitapty Almatyda jazǵan. Túnde qyzy qarasa, saǵat 3-4-te eńirep jylap otyr eken. 2-3 kúnnen keiin qarasa qarqyldap kúlip otyrady. Sosyn qyzy «anamyz birtúrli bolyp qaldy» dep Shymkentke habar beredi. Sosyn Shymkenttegi qyzy joldasymen, bala-shaǵasymen keledi. Anasyna anyqtap qaraidy, aýytqýshylyq joq. Tańǵalady.
«Sonda shyǵarmany jazyp otyrǵanda kóz aldymnan kino siiaqty ótip jatty ǵoi. Ananyń kóshten jalǵyz qalyp ketkeni, «kúieýim – súieýim dep», 25-27 jasynda jasy kelgen joldasyna qarap otyrǵanda eki aidan keiin kúieý, sosyn súzekten jalǵyz uly óledi. Solardy jerlegen kezin elestetkenimde eńirep jyladym. Ananyń óz balasyn óz qolymen jerleýden asqan tragediia bar ma? Qalai kór qazyp, ony súirep kótere almai jetkizip, ekeýin bir kórpeniń astyna jatqyzyp, kórin jaýyp, sol jerde otyryp, joqtaý aitqanynyń bári júregimnen ótti. Sol jerde eńirep jylaǵan bolýym kerek. Al endi kúlgenim, meniń naǵashy atam bolys bolǵan. Ózbekstanǵa kóshedi, odan Tájikstanǵa, odan ary Aýǵanstanǵa kóshpekshi bolady. Bul oqiǵanyń bári ómirde Báidibek aýdanynda ótken. Tórt túlik maldyń ishinde júrip, Tájikstanǵa barǵanda esekpen júrgendi kóredi. Bul taýly-tasty jer. Esekten basqa janýar júrmeidi deidi. Atamyzdyń boiy eki metr bolǵanyn óz kózimmen kórgem. Sonda esekke otyrǵanda esek júrip kele jatyr ma, adam júrip kele jatyr ma, belgisiz qyzyq kórinis shyǵady. Al úzeńgige aiaǵyn salsa, eki tizesi basynan asyp ketedi. Osy jerine kelgende qarqyldap kúlemin. Shyǵarmanyń lázzaty da sonda, óziń jylamasań, óziń kúlmeseń kim oqidy ol kitapty?», – deidi «Alash» Halyqaralyq syilyǵynyń iegeri Hanbibi Eseqaraqyzy.
Qalamgerdiń aitýynsha, Jibek eń jaqyn adamy repressiiaǵa ushyraǵan adamy, basynan ótkergen oqiǵalary.
«Muny jazýyma Ońtústik Qazaqstanda ómir súrgen saiasi qýǵyn-súrgin qurbandary murajaiynda men 15 jyl direktor boldym. Biraq men direktormyn demei, Alash arystarynyń shyraqshysymn dep aityp júrdim ózimdi. Sol kezde talaidyń urpaǵymen kezdestim ǵoi. Iliias Jansúgirov, Muhamedjan Tynyshbaev, Qulymbetovtyń, Táńirbergen Otarbaevtyń urpaqtarymen kezdestim. Óz ata-babam da, naǵashylarym da repressiiaǵa ushyraǵan. Mundai shyǵarmany jazbaýǵa qaqym bar ma?», – deidi qalamger Hanbibi Eseqaraqyzy.
