Almaty oblys ákimi Amandyq Batalov Qazaqstan Respýblikasynyń 18 millionynshy turǵyny dúniege kelgen Taldyqorǵan qalasynda turatyn Bestibaevtar otbasyna arnaiy baryp quttyqtap, jas otbasyǵa 3 bólmeli páter beriletinin aitty. Pedagogtar otbasynyń ekinshi perzenti Mýslima Samatqyzy 18 millionynshy turǵyn atanyp otyr, dep habarlaidy "Ult aqparat" oblys ákiminiń baspasóz qyzmetine silteme jasap.
Elbasynyń atynan nárestege arnalǵan qural-jabdyqtar, atap aitqanda besik, tósek, koliaska, oiynshyqtar sekildi qajettilikterdi syiǵa tartqan oblys ákimi A. Batalov:
- Elimizdiń on segiz millionynshy turǵynynyń Almaty oblysynyń ortalyǵy Taldyqorǵan qalasynda dúniege kelgeni – bárimiz úshin erekshe qýanyshty oqiǵa. Demografiialyq ósiminiń jyldan jylǵa ulǵaiyp kele jatqany halyqtyń Elbasymyzdyń saliqaly saiasatyna, Qazaqstannyń bolashaǵyna degen seniminiń zor ekenin bildiredi. Jas urpaqtyń alańsyz ósip, bilim alýyna elimizde barlyq jaǵdai jasalyp keledi. Elbasynyń atynan, Jetisý jurtshylyǵynyń atynan osy aitýly oqiǵamen shyn júrekten quttyqtaimyn. Kishkentai náreste aman-saý ósip, er jetip, eldiń abyroily azamaty bolsyn! – dei kele, qalada kúzge taiaý paidalanýǵa beriletin jańa turǵyn úiden jas otbasyna 3 bólmeli páter beriletinin jetkizdi.
Mýslimanyń atasy Erkinbek Bestibaev pen ájesi Bibitai Jasybaeva kishkentai nárestege, jas otbasyna, jalpy óz áýletterine kórsetilgen úlken qurmet pen syi úshin Prezidentke, oblys basshylyǵyna rizashylyǵyn bildirdi.
- Mýslima – bizdiń jetinshi nemeremiz. Biz ul-qyzdarymyz ben nemerelerimizdi elge qyzmet etetin, memleketimizdiń damýyna óz úlesin qosatyn bilikti azamat etip tárbieleýge bar kúsh-jumsaityn bolamyz, - dedi Bibitai apa.
Sábidiń anasy Diana Omarhanova 1991 jyly týǵan, qaladaǵy № 16 mektepte defektolog maman bolsa, ákesi Bestibaev Samat 1982 jyly týǵan, № 5 mektepte dene shynyqtyrý pániniń muǵalimi.
Aita ketsek, Qazaqstan Respýblikasy Ulttyq ekonomika ministrliginiń Statistika jónindegi komitetiniń málimeti boiynsha, 2017 jyldyń 11 mamyrynda Qazaqstan Respýblikasy halqynyń sany 18 mln.-ǵa jetip, esep boiynsha Taldyqorǵan qalasynda týǵan Mýslima Samatqyzy 18 millionynshy turǵyn atanǵan.
