Foto: buqara.kz
Kókshetaýda 170 million teńgeden astam biýdjet qarajatyn jymqyrý deregi boiynsha sot úkimi shyqty, dep habarlaidy Ult.kz.
Qalalyq sot 20 sáýirde bul qylmystyq isti qarap, úsh aiyptalýshyǵa qatysty sheshim qabyldady. Sot aldynda Kókshetaý qalasy ákimdiginiń turǵyn úi-kommýnaldyq sharýashylyq bóliminiń burynǵy basshysy, tehnikalyq qadaǵalaý ókili jáne merdiger uiymnyń jetekshisi jaýap berdi.
Olar Qazaqstan Respýblikasy Qylmystyq kodeksiniń 190-baby 4-bóligi (asa iri kólemdegi alaiaqtyq), 361-baby 4-bóligi (laýazymdyq ókilettikterdi asyra paidalaný) jáne 218-baby (qylmystyq jolmen alynǵan qarajatty zańdastyrý) boiynsha kináli dep tanyldy.
Aqmola oblysynyń arnaiy prokýrorlary júrgizgen tergeý nátijesinde, 2020 jyly Qopa kóli jaǵalaýyndaǵy qurylys kezinde top músheleri 170 million teńgeden astam biýdjet qarajatyn jymqyrǵany anyqtaldy. Keiin bul qarajat zańdastyrylǵan.
Sot úkimimen aiyptalýshylar 5 jyl 8 ai, 6 jyl 8 ai jáne 9 jyl merzimge bas bostandyǵynan aiyryldy.
Úkim ázirge zańdy kúshine engen joq.
