Qazaqstanda tumaý men respiratorlyq virýstyq infektsiialardyń aldyn alýǵa baǵyttalǵan jumystar tolyǵymen júrgizildi. Bul týraly búgin Astanada selektorlyq rejimde ótken keńeste QR Bas memlekettik sanitarlyq dárigeri Jandarbek Bekshin aitty, dep habarlaidy QazAqparat tilshisi.
«Tumaý jáne respiratorlyq virýstyq infektsiialardyń aldyn alýǵa baǵyttalǵan jumystar respýblika boiynsha tolyǵymen júrgizildi. Barlyq aimaqtarǵa vaktsina jetkizildi. Endi Densaýlyq saqtaý basqarmalary aldyn alý jumystaryn sapaly deńgeide ótkizýi qajet. Óitkeni, aǵymdaǵy jyly jańadan shyqqan virýstyń eki shtamy taralady. Jalpy, jylda aýrýǵa shaldyǵýdyń 500 myńnan astam deregi tirkeledi. Onyń ishinde aýyr jaǵdaiǵa shaldyqqandary aýrýhanaǵa túsedi. Soǵan bizdiń oblystaǵy basqarmalar daiyndyq jasaýlary qajet. Eń aldymen virýsqa qarsy dári-dármekterdi, basqa da qajetti meditsinalyq jabdyqtardy qamtamasyz etý kerek. Sonymen qatar der ýaqytynda meditsinalyq kómek kórsetilýi tiis», - dep atap ótti ol.
J.Bekshinniń aitýynsha, táýekel tobyna kiretin adamdardy tumaýǵa qarsy egý úshin biýdjet qarajatyna «Grippol +» reseilik vaktsinasynyń 1 605 891 dozasy satyp alynyp, óńirlerge jiberilgen. Ýaqytyly kómek kórsetý maqsatynda meditsinalyq mekemelerde 1226 telefon jumys isteidi, úige shaqyrtýlarǵa qyzmet kórsetý úshin 1025 kólik bólingen. Tumaýǵa qarsy ekpe júrgizý maqsatynda respýblika boiynsha 2428 pýnkt uiymdastyrylǵan.
